ترک میڈیا نے ایرانی صدر کے ہیلی کاپٹر حادثے سے متعلق سوالات اٹھا دیئے

ترک میڈیا نے ایرانی صدر ابراہیم رئیسی کے ہیلی کاپٹر حادثے سے متعلق سوالات اٹھا دیئے۔

غیرملکی میڈیا رپورٹس کے مطابق ترک میڈیا نے سوال اٹھایا کہ ایرانی صدر ابراہیم رئیسی کے لئے 30 برس پرانا امریکی ہیلی کاپٹر کیوں استعمال کیا گیا؟، امریکی ساختہ ہیلی کاپٹر ایرانی صدر کے استعمال میں کیسے آیا؟، 3 ہیلی کاپٹروں پر مسافروں کی ترتیب کیوں بدلی گئی؟۔

رپورٹ میں بتایا گیا کہ ایرانی صدر کیلئے پائلٹ کا چنائو ماضی میں پاسدران انقلاب کے اہلکاروں میں سے کیا جاتا تھا تاہم اس بار ان کے پائلٹ کا تعلق آرمی سے تھا۔

ایرانی صدر ماضی میں تبریز کے دوروں کیلئے روسی ہیلی کاپٹر استعمال کرتے رہے، اب امریکی کیوں کرنا پڑا؟ٹریکنگ سسٹم کے باوجود جائے حادثہ کا فوری تعین کیوں نہ ہوسکا؟

ترک میڈیا نے مزید سوالات اٹھاتے ہوئے کہا ہے کہ ہیلی کاپٹر سگنل کے فعال یا خراب ہونے کا کیوں نہ نوٹ ہوا؟ دورہ شیڈول کے مطابق وزیر خارجہ اور گورنر تبریز نے 2 نمبر ہیلی کاپٹر میں سوار ہونا تھا وہ اس پر سوار کیوں نہ ہوئے؟۔

ایرانی صدر کے ہیلی کاپٹر کو حادثہ بظاہر موسم اور تکنیکی وجوہات کی بنا پر پیش آیا۔

دوسری جانب ایرانی حکومت کے اہلکار غلام حسین اسماعیلی کا کہنا ہے کہ ہیلی کاپٹر نے پرواز کی تو موسم ٹھیک تھا ، پروازکے 45 منٹ بعد صدارتی پائلٹ نے کہا کہ بادل سے بچنے کیلئے پرواز کو اونچی کریں۔

30 سکینڈ بعد ہمارے پائلٹ نے نوٹ کیا کہ صدر کا ہیلی کاپٹر غائب ہو گیا ہے۔

یاد رہے کہ ایران حکام کی جانب سے ہیلی کاپٹر حادثے کی تحقیقات شروع کر دی گئی ہیں، ایرانی چیف آف سٹاف نے اعلیٰ سطح کی تحقیقاتی کمیٹی تشکیل دے دی، تحقیقاتی کمیٹی کی سربراہی چیف آف سٹاف کے ڈپٹی کوآرڈی نیٹر کر رہے ہیں، تحقیقاتی کمیٹی میں فوجی افسران اور تکنیکی ماہرین بھی شامل ہیں۔