رشی سونک نے 4 جولائی کوبرطانیہ میں الیکشن کرانے کا اعلان کر دیا

برطانیہ کے وزیراعظم رشی سونک نے 4 جولائی کو ملک میں الیکشن کرانے کا اعلان کر دیا۔ برطانوی نشریاتی ادارے بی بی سی کے مطابق رشی سونک نےڈاؤننگ اسٹریٹ کے باہر خطاب کرتے ہوئے ملک میں  الیکشن کرانے کا اعلان کیا۔

برطانوی وزیراعظم دفتر کے مطابق الیکشن کے اعلان کے بعد برطانوی پارلیمنٹ جمعے کو تحلیل ہوجائے گی۔

رشی سونک کا اپنے خطاب میں کہنا تھا کہ  آج کنگ چارلس سے ملاقات کی ہے اور انہیں قبل از وقت انتخابات کے فیصلےسے آگاہ کیا۔بادشاہ چارلس نے پارلیمنٹ تحلیل کرنےکی درخواست منظور کرلی ہے۔

سونک نے اپنے خطاب میں مزید کہا کہ یوکرین میں جنگ نے عالمی سلامتی کو خطرہ میں ڈال دیا ہے، پچھلے پانچ سالوں میں ملک کو دوسری جنگ عظیم کے بعد سے سب سے مشکل وقت سے لڑتے دیکھا، ملک نے ان چیلنجز کا مقابلہ کیا اور اس چیز پر انہیں برطانوی ہونے پر فخر ہے۔

انہوں نے مزید کہا کہ یہ برطانیہ کے مستقبل کا فیصلہ کرنے کا بہترین لمحہ ہے۔