بشام حملے میں جاں بحق ہونیوالے چائنیزلواحقین کیلئے امدادی پیکیج دینے کا فیصلہ

وفاقی حکومت کی جانب سے بشام حملے میں جاں بحق ہونیوالے چائنیز کے لواحقین کیلئے امدادی پیکیج دینے کا فیصلہ کر لیا ہے۔

وفاقی وزیر خزانہ محمد اورنگزیب کی جانب سے اقتصادی رابطہ کمیٹی (ای سی سی) کا اجلاس آج طلب کر لیا گیا ہے۔ اجلاس میں بشام میں ہونے والے دہشتگردی کے واقعے میں ہلاک ہونے والے چینی باشندوں کے اہل خانہ کے لئے معاوضے کی منظوری دی جائے گی۔

کابینہ کی اقتصادی رابطہ کمیٹی آج چائنیز کے لواحقین کے لیے امدادی پیکج کی منظوری سمیت 10 نکاتی ایجنڈے کا جائزہ لے گی۔ ای سی سی کا اجلاس شام تین بجے وزیر خزانہ محمد اورنگزیب کی زیر صدارت ہوگا۔

ذرائع کے مطابق چینی باشندوں کے لئے 25 لاکھ 80 ہزار ڈالرز زر تلافی دینے کی سمری تیار کی گئی ہے۔ اس کے علاوہ اجلاس میں روز ویلٹ ہوٹل نیو یارک کو درپیش مسائل، اسٹیل ملز کو گیس کی فراہمی کے لئے سوئی سدرن گیس کمپنی کے بقایا جات ادا کرنے کا بھی جائزہ لیا جائے گا۔

ای سی سی کے اجلاس میں وزارتِ داخلہ کے لیے 6کروڑ 40لاکھ روپے کی تکنیکی ضمنی گرانٹس کی دو سمریوں کا بھی جائزہ لیا جائے گا۔

علاوہ ازیں وزارت داخلہ کے لیے 5 کروڑ 45 لاکھ روپے کے سپلیمنٹری گرانٹ اور نیوکلئیر ریگولیٹری اتھارٹی کے لیے 18 کروڑ 45 لاکھ روپے کی سپلیمنٹری گرانٹ کی بھی منظوری دی جائے گی۔