کینیڈا میں نوجوان نے مسلمان خاندان کو ٹرک سے کچل ڈالا، چار افراد جاں بحق

تفصیلات کے مطابق کینیڈامیں ایک اورخاندان مذہبی منافرت کی بھینٹ چڑھ گیا ، یہ افسوس ناک واقعہ  گزشتہ شام کینیڈا کے صوبہ اونٹاریو میں پیش آیا جہاں ایک پک اپ ٹرک رائیور نے فٹ پاتھ پر گاڑی چڑھا کر ایک ہی خاندان کے چار افراد کو روند ڈالا، جاں بحق افراد میں عمر رسیدہ ماں، فزیوتھراپسٹ بیٹا، بہو اور کمسن پوتی شامل ہیں جبکہ نو برس کا پوتا شدید زخمی ہوا۔ بدقسمت خاندان14سال قبل پاکستان سےکینیڈامنتقل ہواتھا۔

 خاندان کو ٹرک سے روندنے والا دہشتگرد مذہبی تعصب میں مبتلا تھا، جسے پولیس نے فوری طور پر گرفتار کرلیا۔کینیڈین پولیس کا کہنا ہے کہ ایک مسلمان خاندان  کو مذہبی تعصب کانشانہ بنایا گیا ، اس بات کےثبوت موجودہیں کہ یہ سب باقاعدہ منصوبہ بندی سےکیاگیا،ملزم پرقتل کامقدمہ چلایاجائےگا، ملزم پردہشتگردی کی دفعات بھی لگائی جاسکتی ہیں۔

کینیڈین وزیراعظم جسٹن ٹروڈو کا کہنا ہے کہ اونٹاریو واقعے نے انہیں ہلا کر رکھ دیا ہے، کینیڈا میں اسلاموفوبیا کے لیے کوئی جگہ نہیں، اس نفرت کو ختم کرنا ہوگا۔ دہشتگردی  کے اس واقعے سے پاکستانیوں سمیت مسلم کمیونٹی میں تشویش کی لہر دوڑ گئی ہے ۔

اس سے قبل 2017 میں کینیڈا کی کیوبک سٹی کی ایک مسجد میں دہشتگرد حملے میں  چھ افراد ہلاک ہوئے تھے۔