رفح کیمپ حملہ : اقوام متحدہ کا فوری جنگ بندی کا مطالبہ

سیکرٹری جنرل اقوام متحدہ انتونیو گوتریس نے کہا کہ غزہ میں دہشت اور مصائب کا سلسلہ ہر صورت بند ہو نا چاہئے۔

غزہ کے جنوبی علاقے رفح میں پناہ گزین فلسطینیوں کے کیمپ پر اسرائیل کے ہولناک حملے کے بعد اقوام متحدہ کے اداروں نے علاقے میں فوری جنگ بندی اور انسانی امداد کو رسائی دینے کا مطالبہ کیا ہے۔

پناہ گزینوں کی خیمہ بستی پر ہونے والے اس حملے میں خواتین اور بچوں سمیت 45 افراد ہلاک ہو گئے تھے۔

اقوام متحدہ کے سیکرٹری جنرل انتونیو گوتیرس نے اپنے ایک بیان میں اسرائیلی حملے کی مذمت کرتے ہوئے غزہ میں فوری طور پر جنگ بندی کے اپنے مطالبے کا دوہرایا۔ ان کا کہنا تھا کہ غزہ میں کوئی بھی جگہ محفوظ نہیں۔

انہوں نے کہا کہ اسرائیلی حکام کو ضرورت مندوں تک انسانی امداد کی فوری، محفوظ اور بلا روک ٹوک ترسیل کی اجازت کی سہولت فراہم کرنی چاہیے اور تمام کراسنگ کو کھولنا چاہیے

عالمی ادارہ صحت (ڈبلیو ایچ او) کے مطابق اس حملے کا نشانہ بننے والے بیشتر لوگوں کو جلنے کے گہرے زخم آئے۔ زخمیوں کو انتہائی نگہداشت میں علاج کی ضرورت ہے لیکن اس مقصد کے لیے درکار بجلی اور اعلیٰ درجے کی طبی خدمات کا علاقے میں کوئی وجود نہیں۔

اقوام متحدہ کی ریلیف اینڈ ورکس ایجنسی برائے فلسطینی پناہ گزین (یو این آر ڈبلیو اے) نے کہا کہ اسرائیل کے انخلا کے احکامات کے بعد تقریباً 10 لاکھ شہری رفح شہر سے بے گھر ہوئے ہیں۔