عدت کیس میں جو آج ہوا ہے یہ انصاف کا قتل ہے، بیرسٹر گوہر

پاکستان تحریک انصاف کے چیئرمین بیرسٹر گوہر نے کہا ہے کہ عدت کیس میں جو آج ہوا ہے یہ انصاف نہیں نا انصافی ہے یہ انصاف کا قتل ہے۔

اسلام آباد میں میڈیا سے گفتگو کرتے ہوئے بیرسٹر گوہر کا کہنا تھا کہ عدت میں نکاح کیس میں بانی پی ٹی آئی اور بشریٰ بی بی کی طرف سے بیانات مکمل ہو چکے تھے،آخر میں جج صاحب پر پریشر ڈالا گیا، یہ بنیادی حقوق کی خلاف ورزی ہے ۔ جو کچھ آج ہوا ہے یہ پہلے سے طے شدہ منصوبہ تھا ۔ خاور مانیکا نے بے ہودہ اور غلیظ گفتگو کی ہے

انہوں نے کہا کہ ہم کہتے ہیں یہ انصاف نہیں ناانصافی ہے،  یہ بنیادی حقوق کے منافی ہے،انصاف کا قتل ہے، یہ وہ کیس ہے جو 2دن میں مکمل ہوچکا تھا،ہمیں ثبوت پیش کرنے کی اجازت نہیں دی گئی، ہم پھر بھی عدلیہ سے امیدیں لگائے بیٹھے ہیں۔

چیئرمین پی ٹی آئی نے مزید کہا کہ خاورمانیکا عدالت کو کہہ رہے تھے مجھے 10منٹ کا وقت چاہیے، عدالت نے خاورمانیکا کو 10منٹ سے زیادہ کا وقت دیا، بیرسٹر گوہر خاور مانیکا نے عدالت میں بہت غیر اخلاقی گفتگو کی ہے۔

رہنما تحریک انصاف شبلی فراز کا کہنا ہے کہ خاور مانیکا نے عدالت میں بہت بری زبان استعمال کی، خاور مانیکا نے بہت ہی فحش باتیں کی، عدالت کو خاور مانیکا کو روک دینا چاہیے تھا، خاور مانیکا کی باتیں اخلاق سے گری ہوئی تھیں، ہمیں معلوم ہے اس وقت عدلیہ اپنے بقاء کی جنگ لڑ رہی ہے۔

انہوں نے کہا کہ کل وہی جج سرخرو ہوں گے جو آنے والی نسلوں کو ذریعہ فخر بنائیں گے، آپ کو انصا ف کرنا چاہیے ،انصاف ہوتا ہوا نظر بھی آنا چاہیے،ملک میں سیاسی عدم استحکام ہے، عدالتوں پر بھاری بوجھ ہے،انصاف کریں۔