حکومت کی ذخیرہ اندوزوں کے خلاف کارروائیاں

حکومت سمگلنگ، ذخیرہ اندوزی اور بجلی چوری کے خلاف زیرو ٹالرنس کی پالیسی پر عمل پیرا ہے۔

اسپیشل انویسٹمنٹ فیسیلیٹیشن کونسل( ایس آئی ایف سی) کے تحت اقدامات جو کہ گزشتہ سال ستمبر سے نافذ العمل ہیں، کے نتیجے میں متعدد گرفتاریاں اور اربوں روپے کی ریکوری ہوئی ہے۔

انسداد اسمگلنگ آپریشن کے دوران مجموعی طور پر 3036 میٹرک ٹن کھاد کی اسمگلنگ اور اس کی غیر قانونی نقل و حرکت کو ناکام بنایا گیا۔

ضروری اشیا کی سمگلنگ کی روک تھام کرتے ہوئے حکام نے سمگلروں سے 281 میٹرک ٹن گندم اور آٹا قبضے میں لے لیا۔

گزشتہ نو ماہ کے دوران 34 ہزار 640 میٹرک ٹن چینی پکڑی گئی جس کی وجہ سے چینی کی غیر قانونی منافع خوری کا خاتمہ ہوا۔ اسی مدت کے دوران، حکام نے ذخیرہ اندوزوں سے 27,923 میٹرک ٹن کھاد ضبط کی اور کسانوں کو اس کی دستیابی کو یقینی بنایا۔

ذخیرہ اندوزی کے سبب مارکیٹ میں قیمتوں میں ہیرا پھیری کرنے والوں سے 2503 میٹرک ٹن گندم، 56948 میٹرک ٹن گھی اور 10379 میٹرک ٹن چینی برآمد کی گئی۔

 قانون نافذ کرنے والے اداروں نے بجلی چوری میں ملوث افراد کے خلاف 145,365 FIR درج کیں اور 70,000 سے زائد بجلی چوروں کو گرفتار کر کے 93 ارب  روپے برآمد کئے۔

حکومت کی طرف سے SIFC کے تعاون سے یہ اقدامات قانون کی حکمرانی کو برقرار رکھنے اور پاکستان کی معیشت کے تحفظ کے لیے حکومت کے عزم کی نشاندہی کرتے ہیں۔