گوادرمیں مزدوروں کے قتل میں ملوث دو ملزم گرفتار

وزیر داخلہ بلوچستان میر ضیا لانگو نے آج پریس کانفرنس کرتے ہوئے کہا کہ  سی ٹی ڈی نے گوادر میں کامیاب کارروائی کرتے ہوئے دو دہشت گردوں کو گرفتار کر لیا۔ 
ترجمان سی ٹی ڈی کے مطابق زیرحراست دہشت گرد گوادر میں قتل ہونے والےسات مزدوروں کے قتل میں ملوث تھے ۔ 
دوران تفتیش یہ بات سامنے آئی کہ ایک گروپ ملک میں انتشار پھیلانے کی غرض سے بلوچستان میں لوگوں کو ورغلا کر پنجابیوں کے قتل کی ترغیب دیتا ہے۔ زیر حراست دہشت گرد وں نے اعتراف کیا کہ انہیں ہدایت تھی  کہ جو بھی پنجاب سے آئے اسے قتل کر دو۔ دونوں  دہشت گردوں کا تعلق کالعدم جماعت بی ایل اے سے ہے۔
وزیر داخلہ بلوچستان میر ضیا لانگو نے  بتایا دونوں گرفتار ملزمان سے ہتھیار بھی برآمد ہوئے ہیں ، دہشت گردوں کے  گروپ کے نشاندہی  بھی ہو چکی ہے کہ وہ کہاں سے آئے تھے ، گرفتار ملزمان سے ملنے والے معلومات  کی روشنی میں تفتیش مزید  آ گے بڑھے گی۔
وزیر داخلہ بلوچستان  نے کہا کہ ان دہشت گردوں کو بلوچستان کے حقوق کے حوالے سے کوئی سروکار نہیں ، یہ کوئی حقوق کی جنگ نہیں بلکہ بلوچستان میں دہشت گردی پھیلانے کی سازش ہے، مزید یہ کہ جو بھی بلو چستان کے حقوق کی بات کرے گا ہم اس سے دو قدم آگے ہوں گے۔ 
وزیر داخلہ بلوچستان میر ضیا لانگو  نے عوام کومخاطب کرتے ہوئے کہا  کہ یہ پاکستان بنانے کا وقت ہے۔ معصوم شہری دہشت گردوں کا نشانہ بن رہے ہیں۔  بیرونی عناصر نے بلوچ عوام کو ورغلانے  کی کوششیں کی مگر ہم  دہشت گردوں کو مذموم مقاصد میں کامیاب نہیں ہونے دیں گے۔
 وزیر داخلہ بلوچستان میر ضیا لانگو   نے سکیورٹی اداروں کی کارکردگی کو سراہتے ہوئے کہا کہ  امن و امان کے  قیام کے لیے ریاستی ادارے اور سکیورٹی اداروں کی كوششیں قابل تحسین ہے،   دہشت گردوں کو  پکڑنے کے لیے سی ٹی ڈی مبارکباد کی مستحق ہے۔ انہوں نے مزید کہا کہ  عوام کی حفاظت میں غفلت کرنے والوں اور انتشار پھیلانے والے دہشت گردوں کو نہیں چھوڑیں گے۔