سری لنکا میں بارشوں سے تباہی، 14 افراد ہلاک

سری لنکا میں شدید طوفانی بارشوں کے نتیجے میں آنے والے سیلاب اور لینڈ سلائیڈنگ میں 14 افراد ہلاک اور 5 لاپتہ ہوگئے۔

غیر ملکی میڈیا رپورٹس کے مطابق سری لنکا کے وزیر دفاع نے مقامی میڈیا کو اپنے بیان میں کہا کہ ملک بھر میں شدید بارشوں کے نتیجے میں سیلاب اور لینڈ سلائیڈنگ میں 14 افراد اپنی جان سے ہاتھ دھو بیٹھے۔

انہوں نے بتایا کہ 5 لاپتہ افراد کی تلاش جاری ہے۔

کولمبو کے قریب سیلاب کے باعث ایک ہی خاندان کے تین افراد سمیت متعدد افراد کے ڈوبنے کی اطلاع ہے۔

ڈیزاسٹر مینجمنٹ سینٹر (ڈی ایم سی) نے بتایا کہ مٹی کا تودہ گرنے سےگیارہ سالہ لڑکی اور 20 سالہ شخص دب گئے ہیں ۔21 مئی سے مون سون کی شدت کے بعد سے سات اضلاع میں درخت گرنے سے 9  افراد کی جان جانے کی اطلاع ہے۔

ڈی ایم سی نے بتایا ہے کہ سری لنکا آب پاشی کے ساتھ ساتھ پن بجلی کی تیاری کے لیے بھی موسمی بارشوں پر بھرپور انحصار کرتا ہے۔

ماہرین نے خبردار کیا ہے کہ سری لنکا کو گلوبل وارمنگ کے باعث موسمی تبدیلی سے سیلابی صورتحال کا سامنا کرنا پڑتا ہے۔

ڈیزاسٹر مینجمنٹ سینٹر کا کہنا ہےملک کے 25 میں سے 20 اضلاع موسلا دھار بارش سے متاثر ہوئے ہیں اور اہم دریاؤں کے کناروں بسے خاندانوں کو محفوظ مقامات پر جانے کی وارننگ جاری کی گئی ہے۔