انتخابات کے پیش نظر مقبوضہ کشمیر میں پابندیاں مزید سخت

بھارت کے غیر قانونی زیر قبضہ جموں و کشمیر میں مودی کی زیرسرپرستی بھارتی حکومت نے کل ووٹوں کی گنتی کے پیش نظر تمام اضلاع اور قصبوں میں پابندیاں مزید سخت کر دی ہیں۔

چیف الیکشن آفیسر پانڈو رینج پولے  کے مطابق سکیورٹی انتظامات میں مقامی پولیس اور نیم فوجی دستوں کی تعیناتی کے علاوہ داخلے کی سخت شرائط شامل ہیں۔

دوسری جانب بھارتیہ جنتا پارٹی کے زیر قیادت بھارتی حکومت جاری تحریک آزادی کو دبانے اور کشمیری عوام کو دھمکانے کیلئے اپنی مسلح افواج اور خفیہ اداروں کو ہندوتوا کے ایک ہتھیار کے طور پر استعمال کر رہی ہے۔

کشمیر میڈیا سروس کے مطابق بھارتی فوج، راشٹریہ رائفلز، سنٹرل ریزرو پولیس، سپیشل آپریشن گروپ اور خفیہ ایجنسیوں (این آئی اے )  اور  (ایس آئی اے )  کے اہلکار مقبوضہ جموں و کشمیر بھر میں روزانہ کی بنیاد پر چھاپے مار رہے ہیں اور مقامی رہائشیوں کو شدید ہراساں کر رہے ہیں۔

ضلع پلوامہ میں بھارتی فوج نے ریاستی دہشت گردی کی تازہ کارروائیوں میں دو کشمیری نوجوانوں کو شہید کر دیا۔

نوجوانوں کو بھارتی فوج اور پیرا ملٹری اہلکاروں نے آج ضلع کے علاقے نیہامہ  میں ایک مشترکہ پُرتشدد محاصرے اور تلاشی کی کارروائی کے دوران شہید کیا۔