چین پاکستان اقتصادی راہداری نے پاکستان کی ترقی کا منظر نامہ تبدیل کردیا، وزیر اعظم

پاکستان اور چین نے مشترکہ کوششوں کو سراہنے کے بعد کہا کہ  چین پاکستان اقتصادی راہداری نے پاکستان کی ترقی کا منظر نامہ تبدیل کردیا ہے اور دونوں ممالک کی مربوط ترقی کو فروغ دیا ہے۔

 وزیراعظم شہباز شریف کے چین کے پانچ روزہ سرکاری دورے کے اختتام پرانہوں نے کہا کہ چین اور پاکستان کی مشترکہ کوششوں کے بعد ہی اقتصادی راہداری کامنظر نامہ تبدیل ہوا ہے ۔

فریقین نے کہا کہ سی پیک کے آغاز سے اب تک دونوں ہمسایہ ممالک نے مشترکہ منصوبہ بندی تعمیر اور باہمی طور پر مستفید ہونے کے اصولوں پر عمل کیا اور سی پیک کی تعمیر سے خاطر خواہ نتائج حاصل کئے ، چین کی جانب سے اس عزم کا اعادہ کیا گیا کہ پاک چین تعلقات کو ان کے خارجہ تعلقات میں اولین ترجیح حاصل ہے جبکہ پاکستان کی جانب سے پاک چین تعلقات کو اس کی خارجہ پالیسی کا اہم ستون قرار دیاگیا۔

فریقین نے اس بات کو بھی تسلیم کیاکہ رائے کوٹ سے تھاکوٹ تک شاہراہ قراقرم کی تعمیر نو کا منصوبہ انتہائی اہمیت کا حامل ہے جو دونوں ممالک کے درمیان واحد زمینی رابطے کا ذریعہ ہے۔

چین نے پاکستان کی صنعتی ترقی کے عزم کا اعادہ کیا اور کہا کہ منڈی اور تجارت کے اصولوں کے مطابق چینی کمپنیوں کو پاکستان کے خصوصی اقتصادی زونز میں سرمایہ کاری کی ترغیب دی جائیگی۔

فریقین نے جنوبی ایشیا میں امن وامان برقرار رکھنے کی اہمیت پر زور دیا۔

چین نے اس بات کا اعادہ کیا کہ جموں وکشمیر کا تنازعہ اقوام متحدہ کے منشور کے مطابق پرامن طریقے سے حل کیا جانا چاہے۔

دونوں ملکوں نے افغانستان کی پائیدار ترقی اور اسے بین الاقوامی دھارے میں لانے کیلئے مشترکہ کوششوں پر اتفاق کیا۔