بہت جلد پاکستانی ٹیم میں کم بیک کروں گا : خوشدل شاہ

رپورٹ :انس سعید

ملتان سلطانز کی نمائندگی کرنے والے  خوشدل شاہ نے  جی این این سے خصوصی گفتگو کرتے ہوئے کا کہا کہ پاکستان سپر لیگ کے مقابلوں کی تیاری بہت اچھی ہے، جتنا وقت ملا ہے اس میں بھرپور پریکٹس کی ہے ۔  ابوظہبی میں گرمی کافی زیادہ ہے ایک ہفتے سے زائد ٹریننگ کی ہے جس سے اب موسم کے ساتھ ایڈجسٹ بھی ہوگئے ہیں بطور کرکٹر موسم سے فرق نہیں پڑتا ، پرفارمنس پر فوکس ہوتا ہے۔

بائیں ہاتھ کے بیٹسمین خوشدل شاہ کا کہنا تھا کہ ٹورنامنٹ میں ابھی تمام ٹیمیں اوپن ہیں اور ہر کسی  کے ساتھ جیت کا برابر چانس ہے،  ملتان سلطانز نے شروع میں اچھا پرفارم نہیں کیا لیکن اب کنڈیشنز مخلتف ہیں پہلے دو میچ بہت اہم ہیں ان میں اچھی کارکردگی دینے کی کوشش کریں گے۔ قومی کرکٹر نے کہا کہ ہارڈ ہٹنگ بیٹسمین کو چھ سات نمبر پر ایڈجسٹ ہونے میں مشکل ہوتی ہے،  ٹی ٹونٹی کرکٹ میں چھٹا اور ساتواں نمبر مشکل ہوتا ہے انٹرنیشنل کرکٹ کھیل لی ہے اپنی کمزوریوں پر کام کر رہا ہوں۔

26سالہ بیٹسمین خوشدل شاہ 9 ٹی ٹونٹی اور واحد ایک روزہ میچ میں پاکستان کی نمائندگی کر چکے ہیں۔ انہیں  مسلسل موقع ملنے کے باوجود پرفارمنس تسلی بخش نہ ہونے  پر دورہ جنوبی افریقہ اور زمبابوے کے لیے ٹیم میں شامل نہیں کیا گیا تھا ۔ اس حوالے سے خوشدل شاہ نے بتایا کہ پاکستان ٹیم میں واپسی کے بارے میں ابھی نہیں سوچ رہا ،سارا فوکس ملتان سلطانز کی جیت پر ہے،  بہت جلد پاکستان کرکٹ ٹیم میں کم بیک کروں گا ، محنت کر رہا ہوں ،کوشش ہوتی ہے اچھی سے اچھی پرفارمنس دوں عزت اللہ کے ہاتھ میں ہے۔

یا درہے کہ پاکستان سپر لیگ میں آج دو میچز کھیلے جائیں گے پہلا میچ ملتان سلطانز اور کراچی کنگز کے درمیان جبکہ دوسرا مقابلہ لاہور قلندرز اور پشاور زلمی کے درمیان ہوگا ۔