اسرائیلی فوج نے رفح کراسنگ کے فلسطینی حصے کو نذرآتش کردیا

مصر کے ساتھ رفح بارڈر کراسنگ کے فلسطینی حصے کا کنٹرول حاصل کرنے کے ایک ماہ بعد اسرائیلی فوج نے فلسطینیوں کی جانب کراسنگ کے لیے روانگی کے ہال اور متعدد تنصیبات کو نذر آتش کر دیا۔

غیر ملکی خبر رساں ایجنسی کے مطابق رفح شہر میں بھی مصر- فلسطین کی سرحد پر صلاح الدین (فلاڈیلفیا) کے محور پر متعین اسرائیلی فوجی گاڑیوں کی ایک بڑی تعداد نے شدید گولہ باری میں شہر کے مرکز کی طرف پیش قدمی کی۔اسرائیلی فوج نے غزہ کے جنوب مشرقی حصے الزیتون میں بھی دراندازی کی۔

اسرائیلی فوج نے رفح کراسنگ کے فلسطینی حصے کو ایک ایسے وقت میں نذرآتش کیا ہے جب دوسری جانب عالمی سطح پر امدادی تنظیمیں غزہ کو امدادی سامان کی ترسیل کے لیے رفح کراسنگ کو فوری طور پرکھولنے کا مطالبہ کررہی ہیں۔

ورلڈ ہیلتھ آرگنائزیشن نے حال ہی میں رفح کراسنگ کو جلد از جلد دوبارہ کھولنے اورلاکھوں فلسطینیوں کو ریلیف پہنچانے کے لیے متبادل طریقہ کار تلاش کرنے کی ضرورت پر زور دیا۔

قابل ذکر ہے کہ اسرائیل نے 7 مئی کو اس کراسنگ کے فلسطینی اطراف کا کنٹرول سنبھال لیا تھا جس کے بعد غزہ کو اس کراسنگ سے امداد کی سپلائی روک دی گئی تھی۔