مری میں رات سے وقفے وقفے سے بارش کا سلسلہ جاری

عید کے دوسرے روز ملک کے بیشتر اضلاع میں موسم شدید گرم اور خشک جبکہ مری میں رات سے وقفے وقفے سے بارش کا سلسلہ جاری ہے۔

محکمہ موسمیات کے مطابق بالائی خیبرپختونخوا، کشمیر، گلگت بلتستان، اسلام آباد، پوٹھوہار ریجن میں تیز ہواوٴں اور گرج چمک کے ساتھ بارش کا امکان ہے۔

مری میں رات سے وقفے وقفے سے بارش کا سلسلہ جاری ہے جبکہ جہلم میں بھی صبح کے وقت ہونے والی بارش سے گرمی کی لہر میں خلل پڑا ہے دوسری جانب بلوچستان کے شمال مشرقی اور جنوبی اضلاع، وادی کوئٹہ اور گردونواح میں موسم صاف اور خشک اور گرم ہے۔

محکمہ موسمیات کے مطابق بلوچستان کے جنوبی اور وسطی اضلاع میں گرد آلود ہوائیں چلنے اور گرج چمک کے ساتھ بارش کا امکان ہے جبکہ آج رات کراچی میں چند مقامات پر بوندا باندی کا امکان ہے۔ شہر کا کم سے کم درجہ حرارت 30 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کا امکان ہے۔

محکمہ موسمیات کا کہنا ہے کہ ہوا میں نمی کا تناسب 72 فیصد ہے اور سمندری ہوائیں 30 سے ​​35 کلومیٹر فی گھنٹہ کی رفتار سے چل رہی ہیں۔