زمین کے تنازع پر بااثر شخص نے گدھی کے کان کاٹ دیئے

زمین کے تنازع پر بااثر شخص نے گدھی کے کان کاٹ دیئے۔

ذرائع کے مطابق راولپنڈی میں شہری تنویر نے ملزم ارشد محمود پر گدھی کے کان کاٹنے کا الزام لگا دیا ہے۔

پولیس حکام کے مطابق تھانہ روات کے علاقہ ساگری میں با اثر شخص نے گدھی کے دونوں کان کاٹ دیے جس کا مقدمہ گدھی کے مالک تنویرحسین کی مدعیت میں درج کر لیا گیا ہے۔

ایف آئی آر  کے متن کے مطابق  مالک تنویر حسین کا کہنا ہے گندم کی کٹائی کے بعد گدھی کو  پانی پینے کے لیے آزاد چھوڑا تھا کہ وہ کسی کی زمین میں چلی گئی، ملزم ارشد محمود نے گدھی کے دونوں کان کاٹ ڈالے۔

آیف آئی آر کے مطابق ارشد علاقے کی با اثر شخصیت ہے اور لوگ اس کا نام لینے سے ڈرتے ہیں لیکن اس حوالے سے متاثرہ گدھی کے مالک کا اپنے ویڈیو بیان میں کہنا ہے کہ میں اپنے جانور کو انصاف دلانے کے لیے ہر فورم پر آواز اٹھاؤں گا۔

دوسری جانب پولیس کا کہنا ہے کہ واقعہ ہوا ہے اس پر ابھی تفتیش کر رہے ہیں، مدعی اور ملزم دونوں کے آپس میں زمین کے کیسز بھی چل رہے ہیں۔