انصاف دینے والے آج خود انصاف کے طلب گار ہیں، بیرسٹر گوہر

چیئرمین پاکستان تحریک انصاف بیرسٹر گوہر نے کہا ہے کہ عدلیہ آزادانہ فیصلے کرے، عدلیہ اور ایگزیکٹو آزاد ہونی چاہیئے، ہم ملک میں قانون کی بالا دستی چاہتے ہیں،ایسا معاشرہ چاہتے ہیں جہاں ججزکو ڈرایا نہ جائے۔ ہمارا کسی سے جھگڑا نہیں، انصاف دینے والے خود انصاف کے طلب گار ہیں۔

لاہور ہائی کورٹ بار کی تقریب سے خطاب کرتے ہوئے ان کا کہنا تھا کہ یہ لاہور ہائیکورٹ بار ہے جنہوں نے قانون کی تشریح کر کے عوام کے بنیادی حقوق کا تحفظ کرتے ہوئے یہ یقینی بنایا کہ عدلیہ اور ایگزیکٹو آزاد ہو اور ایک دوسرے پر چیک اینڈ بیلنس رکھیں۔

انہوں نے بتایا کہ جو لوگوں کو انصاف دیتا ہے آج وہ خود انصاف کا طلبگار ہے، تو عوام کے بنیادی حقوق کا تحفظ کیسے ہوگا؟ پاکستان کی عوام یہ پیغام دینا چاہتی ہے کہ اس جدو جہد میں 25 کروڑ عوام جج کے شانہ بشانہ کھڑے ہیں۔ ہمارا کسی کے ساتھ کوئی جھگڑا نہیں، ہم صرف قانون کی بات کرتے ہیں، یہ تب ہوسکتا ہے جب عوام کے حقوق محفوظ ہوں، جب ججز آزادانہ فیصلہ کرسکیں، ایسا نا ہو کہ ججز کے گھروں میں کیمرے لگے ہوں، ان کو ڈرایا دھمکایا جائے، ہمارے کارکنوں کو بار بار گرفتار کرنا، عدلیہ کے احکامات کو ہوا میں اڑانے کی ہم مذمت کرتے ہیں۔

ان کا کہنا تھا کہ عمران خان کے اوپر 203 جھوٹے کیسز بنائی گئے، یہ سیاسی انتقام ہے، اڈیالہ جیل میں جب سماعت ہورہی تھی، 14 گھنٹے ٹرائل ہورہا تھا تو میں نے جج سے پوچھا کہ کتنی دیر بریک کریں گے؟ انہوں نے کہا کہ اتنا بریک کریں گے جتنے میں ہم جمعے کی نماز پڑھ سکیں۔ اسی جج صاحب نے عدت کیس کا دو دن میں فیصلہ کیا۔

شیخ وقاص اکرم نے تقریب سے خطاب کرتے ہوئے کہا کہ پاکستان کس نہج پر پہنچ چکا کہ آج اس تقریب کا عنوان ہے انصاف کو انصاف چاہیے، جن ججوں نے ہمیں انصاف دینا تھا وہ خود انصاف کے متلاشی ہیں آج ججز کی فیملیاں محفوظ نہیں وہ خط لکھنے پر مجبور ہیں کہ مداخلت ہورہی۔ آج وکلاء کو موقع ملا ہے آئین کے تحفظ کا پاکستان کی واحد پارٹی تحریک انصاف جس میں سب سے زیادہ وکلاء کو نمائندگی ملی اس کا چئیرمن ایک وکیل جس کو میرے لیڈر عمران خان منتخب کیا آپ وکلاء کو ٹکٹس ملے عوام نے عمران خان کے نام پر ووٹ دیا اور آپ کے ہی مینڈیٹ پر ڈاکہ ڈالا گیا۔