پی ٹی آئی اسلام آباد میں جلسہ کرنے کی اجازت مل گئی

 پی ٹی آئی اسلام آباد میں 6 جولائی ترنول کے مقام پر جلسہ کرنے کی اجازت مل گئی، ڈی سی اسلام آباد نے عدالتی حکم پر پی ٹی آئی کو یقین دہانی کرادی۔

اسلام آباد ہائیکورٹ کے جسٹس بابر ستار کی ہدایت پرڈی سی اسلام آباد اور پی ٹی آئی صدر اسلام آباد ریجن عامر مغل کی ملاقات ہوئی، ملاقات میں جلسے کے مقام کے لئے مین پشاور روڈ ترنول چوک پر اتفاق ہو گیا۔ عامرمغل کی جانب سے 6 جولائی بروز ہفتہ کی شام کی تاریخ مانگی گئی۔

ڈی سی اسلام آباد عرفان نواز میمن نے حامی بھر لی۔ تحریک انصاف 6 جولائی ہفتہ کی شام ترنول چوک مین پشاور روڈ پر جلسہ کرے گی۔ عامر مغل نے پنڈی اسلام آباد کے کارکنان کو جلسہ کی تیاری کر ہدایت کر دی۔ 

صدر پی ٹی آئی اسلام آباد عامر مغل نے کہا ہے کہ ڈی سی کی جانب سے زبانی منظوری دی گئی ہے،ڈی سی صاحب نے کہا ہے وہ آج این او سی بھی جاری کر دیں گے۔ 6 جولائی شام کو راولپنڈی اسلام آباد کی تاریخ کا سب سے بڑا جلسہ ہوگا جس میں عوام بھرپور شرکت کریں گے، جلسہ ثابت کرے گا راولپنڈی اسلام آباد پی ٹی آئی کا قلعہ ہے۔

واضح رہے کہ ہائیکورٹ نے آج صبح ڈی سی اور صدر پی ٹی آئی عامرمغل کو آپس میں بیٹھ کر جلسہ کا مقام تعین کرنے کی ہدایت کی تھی۔