پاکستان پرآئی ایم ایف کا قرض فقط 18 فیصد، مصطفی کمال کی حکومت پر کڑی تنقید

پاکستان متحدہ قومی موومنٹ (ایم کیو ایم )  کے رہنما مصطفیٰ کمال نے کہا کہ 77 ہزار ارب کے قرضے کو اتارنے کے لیے عوام پر مزید ٹیکس لگانا زیادتی کے مترادف ہے ۔ 

پاکستان متحدہ قومی موومنٹ (ایم کیو ایم )  کے رہنما مصطفیٰ کمال نے میڈیا سے غیر رسمی گفتگو کرتے ہوئے کہا کہ پاکستان کو اس وقت مجموعی طور پر 77 ہزار ارب روپے کے قرض کا سامنا ہے، مگر اس میں آئی ایم ایف کا حصہ فقط 18 فیصد ہے۔ بقیہ 82 فیصد قرضہ اندرونی ہے، جو کہ ہم اپنے مقامی بینکوں سے حاصل کرتے  ہیں۔ 
ایم کیو ایم رہنما نے کہا کہ ریاست میں رہنے والے تمام شہریوں کا یہ آئینی حق ہے کہ ریاست انہیں بجلی، گیس اور سیکیورٹی مہیا کرے، مگر حقیقت یہ ہے کہ یہاں پر لوگوں کو سیوریج سے لے کر پینے کے پانی تک کی سہولت میسر نہیں۔ حتیٰ کہ سیکیورٹی کے لیے بھی لوگوں کو پرائیویٹ گارڈز رکھنے پڑتے ہیں۔  یہاں موبائل چھیننے والے انسانی جانوں سے کھیلتے ہیں اور کچھ لوگ تو اس گھناؤنے کھیل میں جان سے بھی ہاتھ دھو بیٹھتے ہیں ، یہاں تک کہ ملک کے گولڈ میڈلسٹ جیسے سرمائے کو بھی قتل کر دیا گیا۔ 
مصطفیٰ کمال نے بجٹ پر اپنا اظہار رائے کرتے ہوئے کہا کہ جہاں عوام پہلے ہی ٹیکسوں کے بوجھ تلے دھنسی ہوئی ہے، ہم عوام کو کیسے کہ دیں کہ آپ قرض کو اتارنے کے لیے ہمیں ٹیکس کی مد میں مزید پیسے دیں۔ انہوں نے کہا کہ یہ سب ہم ایوان میں آکر بول تو دیں، مگر زمینی حقائق یہی ہیں کہ عوام مزید ٹیکس ادا نہیں کر سکتی۔ 
ایم کیو ایم رہنما مصطفیٰ کمال نے کہا کہ بجائے لمبی تقاریر کرنے کے ہمیں مسائل کے حل کی ممکنہ صورتوں پر غور کرنا چاہیے۔ انہوں نے بتایا کہ ہم نے پارلیمنٹ میں اپنی تجاویز پیش کی ہیں۔ پہلے سے ٹیکس دینے والوں پر مزید ٹیکس لگانا زیادتی ہے۔ اس کے بجائے ٹیکس نیٹ میں وہ لوگ لائے جائیں جو ٹیکس کی ادائیگی نہیں کر رہے۔