امریکا کو ہمارے اندرونی معاملات میں مداخلت کا حق نہیں، طاہر اشرفی

چیئرمین پاکستان علماء کونسل حافظ طاہر محمود اشرفی نے کہا ہے کہ امریکی کانگریس کی قرارداد قابلِ مذمت ہے، امریکا کو ہمارے اندرونی معاملات میں مداخلت کا حق نہیں۔

میڈیا سے گفتگو کرتے ہوئے طاہر محمود اشرفی نے کہا کہ دہشتگردی کے خلاف قومی یکجہتی کی ضرورت ہے، ایس آئی ایف سی کے کام کی تائید کرتے ہیں، عزمِ استحکام آپریشن اور نیشنل ایکشن پلان پر مکمل عمل درآمد ہونا چاہیے۔

طاہر اشرفی نے کہا کہ منافرت پھیلانا اور طاقت کے ذریعے اپنا نظریہ مسلط کرنا غیر شرعی ہے۔ پاکستان میں تمام اقلیتوں کو تحفظ اور ہر کسی کو مکمل مذہبی آزادی حاصل ہے۔

چیئرمین علماء کونسل نے مطالبہ کیا کہ ملک سے انتہا پسندی اور شدت پسندانہ رویے کے خاتمے کیلئے متفقہ لائحہ عمل بنایا جائے۔

انہوں نے مزید کہا کہ امریکی کانگریس نے قرارداد منظور کر کے پاکستانی مینڈیٹ کی توہین کی، امریکا کو فلسطین میں انسانیت کیوں نظر نہیں آ رہی؟۔