ماحولیاتی تبدیلی کی رابطہ کار خورشید عالم کا خصوصی ٹی وی چینل شروع کرنے کا اعلان

وزیراعظم کی رابطہ کار برائے موسمیاتی تبدیلی رومینہ خورشیدعالم نے موسمیاتی تبدیلی کے اثرات سے نمٹنے میں کسانوں کی مدد کے لئے ایک خصوصی ٹی وی چینل شروع کرنے کا اعلان کیا ہے۔

انہوں نے ایک بیان میں کہا کہ اس چینل کا مقصد کسانوں کو موسم کے مطابق حکمت عملی اختیار کرنے، قدرتی آفات سے نمٹنے کے طریقے اختیار کرنے اور ماحولیاتی انحطاط کے اثرات کم کرنے کے لئے مستقل طریقہ کار وضع کرنے کے بارے میں آگاہی فراہم کرنا ہے۔

رابطہ کار نے کہاکہ اس چینل کے لئے پاکستان ٹیلی ویژن کی خدمات حاصل کی جائیں گی اور چھ علاقائی زبانوں میں پروگرام نشر ہوں گے تاکہ ماحولیاتی اثرات کا شکار علاقوں کے لوگوں کو بروقت اطلاعات فراہم کی جاسکیں۔

رومینہ خورشید نے کہا کہ حکومت موسمیاتی تبدیلی کا مقابلہ کرنے کے لئے کاشتکاروں کو معلومات فراہم کرکے انہیں بااختیار بنانا چاہتی ہے۔