ملک بھر میں فلورملز ہڑتال کے باعث غیر معینہ مدت کیلئے بند

حکومت اور فلور ملز ہول سیلرز میں تاحال ڈیڈ لاک برقرار ہے، پاکستان بھر میں آج سے فلور ملز غیر معینہ مدت کے لئے بند کردی گئیں۔

ذرائع کے مطابق پاکستان بھر کی 1500 سے زائد فلور ملز میں گندم کی واشنگ بند کردی گئی،11 جولائی کو آٹے پیکنگ اور ترسیل بھی مکمل طور پر بند کر دی جائے گی، لاہورسمیت صوبہ بھر میں آئندہ دو روز میں آٹے کی سپلائی بند ہونے سے مشکلات بڑھنے کا خدشہ ہے۔

چیئرمین پاکستان فلور ملز ایسوسی ایشن عاصم رضا کا کہنا ہے کہ آٹا کھانے کی آئٹم ہے اس پر ود ہولڈنگ ٹیکس کا نفاذ کسی صورت قبول نہیں، کسی صورت ایف بی آر کے ود ہولڈنگ ٹیکس ایجنٹ نہیں بنیں گے۔

ود ہولڈنگ ٹیکس عائد ہونے کی صورت میں فلورملز اور ہول سیلرز نے ہڑتال کا اعلان کر دیا۔

خیال رہے کہ گزشتہ روز پاکستان فلور ملز ایسوسی ایشن نے گندم کی مصنوعات پر ودہولڈنگ ٹیکس عائد کرنے کے خلاف 10 جولائی سے گندم کی واشنگ روکنے اور 11 جولائی سے غیر معینہ مدت کے لیے فلور ملیں بند کرنے کا اعلان کیا تھا ۔

یہ اعلان پاکستان فلور ملز ایسوسی ایشن کے چئیرمین چوہدری عامر عبداللہ نے منگل کو چوہدری محمد یوسف ودیگر عہدیداروں کے ہمراہ کراچی میں پریس کانفرنس کرتے ہوئے کیاگیا تھا۔