وزارت توانائی حکام بجلی کے بلوں میں اضافے کی ذمہ دار قرار

لاہور: وفاقی تحقیقاتی ادارے(ایف آئی اے) سمیت دیگر اداروں نے بجلی کے زائد بلوں کی تحقیقات مکمل کر کے تفصیلات حکومت کو ارسال کر دیں۔

ذرائع کے مطابق ارسال کی گئی رپورٹس میں وزارت توانائی کو حالیہ بجلی کے بلوں میں اضافے کا ذمہ دار قرار دے دیا گیا۔

رپورٹ میں دعویٰ کیا گیا کہ وزارت توانائی نے ڈسکوز میں پروریٹا سسٹم متعارف کروایا، جس کا اطلاق نوٹیفیکشن کے ذریعے کیا گیا۔ پروریٹا سسٹم کی بدولت بجلی کے بلوں میں اضافی یونٹس شامل کیے گئے۔

بجلی کے بلوں میں شامل کیے گئے اضافی یونٹس کی بدولت پروٹیکٹڈ صارفین نان پروٹیکٹڈ صارفین کی صف میں آ گئے،جس کے نتیجے میں صارفین کے بجلی کے بلوں میں ہوشربا اضافہ ہو گیا۔

یاد رہے کہ بجلی کے بلوں میں حالیہ اضافے کے بعد وزیر داخلہ محسن نقوی نے نوٹس لیتے ہوئے تحقیقاتی اداروں کو ذمہ داران کا تعین کرنے کا کام سونپا تھا۔ حکومت کی جانب سے یہ بھی دعویٰ کیا گیا تھا کہ بجلی کے بلوں میں وصول کی گئی اضافی رقم صارفین کو واپس کی جائے گی۔