پاکستان اسٹاک ایکسچینج میں شدید مندی، 100 انڈیکس 1ہزار پوائنٹس نیچے آ گیا

پاکستان اسٹاک ایکسچینج (پی ایس ایکس) میں ہفتے کے آخری کاروباری روز ابتدائی ٹریڈنگ کے دوران شدید مندی کا رجحان دیکھا جا رہا ہے۔ بینچ مارک کے ایس ای-100 انڈیکس ایک ہزار سے زائد پوائنٹس کی کمی سے 81 ہزار کی نفسیاتی حد سے نیچے آ گیا ہے۔

پی ایس ایکس ویب سائٹ کے مطابق صبح کے ایس ای-100 انڈیکس ایک ہزار 6 پوائنٹس یا 1.23 فیصد تنزلی کے بعد 80 ہزار 833 پر آ گیا۔ یہ گزشتہ روز کے 81 ہزار 839 کے اختتامی لیول سے نیچے ہے۔

ماہرین کا کہنا ہے کہ ملکی معاشی صورتحال پر خدشات خاص طور پر روپے کی مسلسل گرتی ہوئی قدر اور بڑھتی ہوئی افراط زر ، سرمایہ کاروں کے اعتماد کو متاثر کررہے ہیں۔ عالمی منڈیوں میں اتار چڑھاؤاور امریکہ اور چین کے درمیان جاری تجارتی تنازعہ، بھی مقامی مارکیٹ کو متاثر کر رہا ہے۔

واضح رہے کہ گزشتہ روز 100 انڈیکس 684 پوائنٹس یا 0.84 فیصد اضافے کے بعد 81 ہزار 839 پر پہنچ گیا تھا۔