بانی پی ٹی آئی آکسفورڈ یونیورسٹی کے چانسلر شپ کے امیدوار

بانی پی ٹی آئی اور سابق وزیراعظم عمران خان اڈیالہ جیل راولپنڈی سے آکسفورڈ یونیورسٹی کے چانسلر کے لیے الیکشن لڑیں گے۔

برطانوی خبر رساں ادارے کے مطابق عمران خان 10 سال قید کی سزا کے باوجود آکسفورڈ یونیورسٹی کے آن لائن انتخابات میں حصہ لیں گے۔ یہ پہلی مرتبہ ہے کہ چانسلر کے انتخابات روایتی طریقہ کار کے بجائے آن لائن ہوں گے۔

رپورٹ میں بتایا گیا ہے کہ آکسفورڈ یونیورسٹی کے چانسلر کی نشست ہانگ کانگ کے سابق گورنر اور 21 سال تک عہدے پر فائز رہنے والے لارڈ پیٹن کے استعفے کے بعد خالی ہوئی ہے۔

رپورٹ کے مطابق چانسلر کی نشست کے لیے سابق برطانوی وزرائے اعظم سر ٹونی بلیئر اور بورس جانسن بھی یونیورسٹی کے امیدواروں میں شامل ہیں۔ آکسفورڈ یونیورسٹی کے فارغ التحصیل افراد کو انتخابات میں لڑنے کا موقع ملے گا۔ عام طور پر سیاست دانوں کو ہی چانسلر شپ کی نشست  دی جاتی ہے۔

اس معاملے پر عمران خان کے مشیر زلفی بخاری نے غیر ملکی میڈیا کو بتایا کہ عمران خان آکسفورڈ یونیورسٹی کے چانسلر کے لیے الیکشن لڑیں گے کیونکہ عوامی مطالبہ ہے کہ انہیں الیکشن ضرور لڑنا چاہیے۔

زلفی بخاری کا کہنا تھا کہ  جلد اس کا اعلان عوامی سطح پر کریں گے اور جب ہمیں عمران خان کی طرف سے منظوری مل جائے گی اور اس کے لیے دستخطی مہم شروع کریں گے۔

خیال رہے کہ عمران خان بطور طالب علم آکسفورڈ یونیورسٹی کا حصہ رہ چکے ہیں جہاں 1972 میں انہوں نے کیبل کالج آکسفورڈ سے معاشیات اور سیاست کی تعلیم حاصل کی تھی۔اس کے علاوہ عمران خان 2005 میں بریڈ فورڈ یونیورسٹی کے چانسلر منتخب ہو چکے ہیں۔