اسلام آباد میں جماعت اسلامی کا دھرنا،ریڈ زون سیل

اسلام آباد میں جماعت اسلامی کے اعلان کردہ دھرنے کے پیش نظر شہر میں دفعہ 144 نافذ کر دی گئی ہے۔ شہر کی اہم شاہراہوں پر کنٹینر لگا کر سڑکیں بند کر دی گئی ہیں۔

جماعت اسلامی کے امیر حافظ نعیم الرحمان نے بجلی کی بڑھتی ہوئی قیمتوں کے خلاف آج اسلام آباد میں دھرنے کا اعلان کیا تھا۔ جس کے بعد بڑی تعداد میں کارکن اسلام آباد پہنچنا شروع ہو گئے ہیں۔

شہر میں امن و امان کی صورتحال کو برقرار رکھنے کے لیے پولیس اور دیگر قانون نافذ کرنے والے ادارے الرٹ ہیں۔ شہر میں جلسے جلوسوں پر پابندی عائد کر دی گئی ہے۔

دفعہ 144 کے نفاذ اور سڑکوں پر رکاوٹوں کی وجہ سے شہریوں کو آمدورفت میں مشکلات کا سامنا ہے۔

دوسری طرف پنجاب میں بھی آج سے 3 روز کے لیے دفعہ 144 نافذ کر دی گئی ہے۔ محکمہ داخلہ پنجاب کے نوٹیفکیشن کے مطابق پابندی کا اطلاق جمعہ 26 جولائی سے اتوار 28 جولائی تک ہوگا۔ پابندی کا اطلاق دہشت گردی کے خطرات کے پیشِ نظر کیا گیا ہے۔

محکمہ داخلہ پنجاب کے مطابق موجودہ حالات میں سکیورٹی خطرات کے پیش نظر کوئی بھی عوامی اجتماع دہشت گردوں کیلئے سافٹ ٹارگٹ ہو سکتا ہے۔