حکومت کا تنخواہ دار طبقے کو ریلیف دینے پر غور، معاشی ٹیم کو ٹاسک سونپ دیا

لاہور:  حکومت نے مہنگائی کے اس دور میں عوام کو ریلیف دینے کا فیصلہ کر لیا ہے۔ اس سلسلے میں حکومت نے تنخواہ دار طبقے پر لگنے والے انکم ٹیکس کی شرح پر نظر ثانی کا فیصلہ کر لیا ہے۔

ذرائع کے مطابق ماہانہ ایک لاکھ روپے تک کی تنخواہ پر لگنے والے 2.5 فیصد ٹیکس جزوی یا مکمل واپس لئے جانے کا امکان ہے۔وزیراعظم شہباز شریف نے معاشی ٹیم کو ٹاسک دے دیا۔

ٹیکس ریلیف سے تنخواہ داروں پر 40 کھرب روپے کا بوجھ کم ہو گا۔ تنخواہ دار طبقے کو ریلیف دینے کیلئے فنڈنگ ترقیاتی بجٹ سے لی جائے گی۔

اس کے علاوہ 300 سے 400 یونٹ تک بجلی استعمال کرنے والے بجلی صارفین کو بلز میںرعایت دینے کیلئے بھی مختلف تجاویز زیر غور ہیں تاہم اس حوالے سے حتمی فیصلہ بین الاقوامی مالیاتی ادارے (آئی ایم ایف) سے منظوری لینے کے بعد کیا جائے گا۔

یاد رہے کہ حکومت نے رواں مالی سال سالانہ 6 لاکھ سے 12 لاکھ کمانے والوں کا انکم ٹیکس 5 فیصد کیا ہے۔ ایک لاکھ روپے تک ماہانہ آمدن پر انکم ٹیکس 5 فیصد کر دیا گیا ہے۔ ماہانہ انکم ٹیکس 1250 سے بڑھا کر 2500 روپے کر دیا گیا ہے۔