ملکی معیشت کو بہتر بنانے کیلئے نجی شعبے کو اپنا کردار ادا کرنا ہو گا،وزیر خزانہ

وفاقی وزیر خزانہ محمد اورنگزیب نے کہا ہے کہ ملکی معیشت  کو بہتر بنانے کے لیے نجی شعبے کو اپنا کردار ادا کرنا ہو گا۔

اسلام آباد میں ایک تقریب سے خطاب کرتے ہوئے انہوں نے کہا کہملک کو چلانے کے لیے خیرات کا انحصار کرنا ممکن نہیں ہے۔ ملک خیرات سے نہیں چل سکتا، ٹیکس ہر حال میں دینا پڑے گا۔ ٹیکس ادا کرنا ہر شہری کی ذمہ داری ہے اور اس سے حاصل ہونے والی آمدنی کا استعمال ملک کی ترقی اور عوام کی بہبود کے لیے کیا جاتا ہے۔

وزیر خزانہ محمد اورنگزیب نے آئی ایم ایف کے ساتھ جاری مذاکرات پر بھی روشنی ڈالی۔ ان کا کہنا تھا کہ رواں ماہ کے آخر تک آئی ایم ایف کے ایگزیکٹو بورڈ سے سٹاف لیول معاہدے کی منظوری ملنے کی امید ہے۔ اس معاہدے کے بعد پاکستان موسمیاتی تبدیلیوں سے نمٹنے کے لیے بین الاقوامی مالیاتی اداروں سے فنڈز حاصل کرنے کی کوشش کرے گا۔

محمد اورنگزیب نے مزید کہا کہ پاکستان موسمیاتی تبدیلیوں سے بری طرح متاثر ہو رہا ہے اور اس مسئلے سے نمٹنے کے لیے فوری اقدامات کی ضرورت ہے۔ انہوں نے آبادی میں اضافے کو بھی ایک بڑا چیلنج قرار دیا اور کہا کہ اس مسئلے سے نمٹنے کے لیے بھی موثر حکمت عملی بنانی ہوگی۔

وزیر خزانہ نے بیوروکریسی میں اصلاحات کی ضرورت پر بھی زور دیا اور کہا کہ پرائیویٹ سیکٹر کو ملک کی معیشت میں مزید فعال کردار ادا کرنا چاہیے۔