پی ٹی آئی نے الیکشن ایکٹ ترمیمی بل سپریم کورٹ میں چیلنج کر دیا

اسلام آباد: پاکستان تحریک انصاف کی جانب سے الیکشن ایکٹ ترمیمی بل سپریم کورٹ میں چیلنج کر دیا گیا۔چیئرمین پی ٹی آئی بیرسٹر گوہر علی کان نے منظور شدہ الیکشن ایکٹ ترمیمی بل کیخلاف سپریم کورٹ میں  آئینی درخواست دائر کر دی۔

درخواست پی ٹی آئی نے سلمان اکرم راجہ کی وساطت سے آرٹیکل 184/3 کے تحت دائر کی گئی ہے جس میں الیکشن ترمیمی ایکٹ کو کالعدم قرار دینے کی استدعا کی گئی ہے۔

یاد رہے کہ گزشتہ روز قومی اسمبلی نے اپوزیشن کے شدید احتجاج کے باوجود الیکشن ایکٹ ترمیمی بل کثرت رائے سے منظور کیا تھا بعد ازاں یہ الیکشن ایکٹ ترمیمی بل سینیٹ سے بھی منظور کر لیا گیا تھا۔

پاکستان تحریک انصاف نے الیکشن ترمیمی بل سپریم کورٹ میں چیلنج کر دیا !!#GNN #BreakingNews #NewsUpdates #GNN_Updates pic.twitter.com/VE5rouBxQZ

— GNN (@gnnhdofficial) August 7, 2024

قومی اسمبلی کا اجلاس اسپیکر ایاز صادق کی سربراہی میں ہوا جس میں چیئرمین قائمہ کمیٹی برائے پارلیمانی امور نے انتخابات ایکٹ ترمیم بل پرکمیٹی کی رپورٹ پیش کی، اس دوران الیکشن ایکٹ ترمیمی بل منظوری کے لیے قومی اسمبلی میں پیش کیا گیا جب کہ الیکشن ایکٹ ترمیمی بل زیر غور لانے کی تحریک بھی پیش کی گئی جسے ایوان نے منظور کرلیا۔

واضح رہے کہ گزشتہ روز پاکستان تحریک انصاف (پی ٹی آئی) اور دیگر اپوزیشن جماعتوں نے الیکشن ایکٹ ترمیمی بل کو مستر د کر دیا تھا اور سپریم کورٹ میں چیلنج کرنے کا اعلان کیا تھا۔