ننکانہ صاحب میں بھی مفت وائی فائی سروس کا آغاز

لاہور: وزیر اعلیٰ پنجاب مریم نواز شریف کے وژن کے تحت اب ننکانہ صاحب میں بھی مفت وائی فائی سروس کا آغاز ہو گیا ہے۔ اس سے قبل لاہور اور قصور میں یہ سروس شروع کی جا چکی ہے۔

ننکانہ صاحب میں ابتدائی طور پر مسجد چوک، تحصیل موڑ چوک، کچہری پھاٹک اور ریلوے اسٹیشن سمیت 5 اہم مقامات پر مفت وائی فائی سروس کا آغاز کیا گیا ہے۔ اس سروس سے اب تک 25 ہزار سے زائد شہری فائدہ اٹھا چکے ہیں۔

قصور میں بھی 10 مختلف مقامات پر مفت وائی فائی سروس دستیاب ہے اور جلد ہی مزید 20 مقامات پر اس سروس کو بڑھایا جائے گا۔

وزیراعلیٰ مریم نواز کا کہنا ہے کہ ہمارا مقصد ہر شہری کو مفت اور سستی انٹرنیٹ سروس فراہم کرنا ہے۔ خاص طور پر خواتین اور طالب علموں کو ہنگامی صورتحال میں مدد فراہم کرنے کے لیے یہ سروس بہت اہم ہے۔

وزیراعلیٰ نے لاہور میں مزید 250 مقامات پر مفت وائی فائی سروس شروع کرنے کی ہدایت بھی کی ہے۔