پاکستان سے خلیجی ممالک جانے والے محنت کشوں پر ٹیکس عائد

پاکستان سے خلیجی ممالک جانے والے محنت کشوں پر ٹیکس عائد

اسلام آباد: وفاقی حکومت نے ایک اہم فیصلے کے تحت پاکستان سے خلیجی ممالک جانے والے محنت کشوں پر ایکسائز ڈیوٹی عائد کر دی ہے۔

 فیڈرل بورڈ آف ریونیو (ایف بی آر) نے اس حوالے سے ایک نوٹیفکیشن جاری کیا ہے جس کے مطابق اب خلیجی ممالک جانے والے ہر محنت کش سے 5 ہزار روپے کی ایکسائز ڈیوٹی وصول کی جائے گی۔

حکام کا کہنا تھا کہ یہ ٹیکس محنت کشوں کے ٹکٹ پر عائد کیا گیا ہے اور اسے امیگریشن اینڈ اوورسیز ایمپلائمنٹ بیورو کے تصدیق شدہ لیبر ویزے پر سفر کرنے والوں سے وصول کیا جائے گا۔ 

ایف بی آر حکام کا یہ بھی کہنا ہے کہ یہ رقم فی ٹکٹ فکسڈ ہے اور اسے سعودی عرب، متحدہ عرب امارات، کویت، قطر، بحرین، عمان اور عراق سمیت تمام خلیجی ممالک جانے والے محنت کشوں سے وصول کیا جائے گا۔

اس فیصلے سے ملک میں اور بیرون ملک مقیم پاکستانیوں میں کافی رد عمل سامنے آ رہا ہے۔ ایک جانب جہاں حکومت اس فیصلے کو ملک کے خزانے کو بڑھانے کا ذریعہ قرار دے رہی ہے، وہیں دوسری جانب محنت کشوں کو اس پر شدید اعتراض ہے۔ ان کا کہنا ہے کہ وہ پہلے ہی مہنگائی اور بے روزگاری کے مسائل سے دوچار ہیں اور اس نئے ٹیکس سے ان کی مشکلات مزید بڑھ جائیں گی۔