موجودہ اقتصادی چیلنجز سنگین، نمٹنے کیلئے دن رات کوشاں ہیں، وزیراعظم

اسلام آباد: وزیر اعظم شہباز شریف نے پاکستان چین فرینڈ شپ سینٹر میں منعقدہ قومی علما و مشائخ کانفرنس سے خطاب کرتے ہوئے ملک کی موجودہ اقتصادی صورتحال اور قومی یکجہتی کی ضرورت پر زور دیا۔ انہوں نے کہا کہ حکومت کے پاس مہنگائی اور بجلی کے بڑھتے ہوئے نرخوں سے فوری نجات دلانے کے وسائل نہیں ہیں، لیکن اس سلسلے میں مکمل کوششیں جاری ہیں۔

پاکستان چین فرینڈ شپ سینٹر میں قومی علما و مشائخ کانفرنس کا انعقاد کیا گیا ہے، علما مشائخ کانفرنس میں وزیراعظم شہباز شریف اور آرمی چیف جنرل عاصم منیر سمیت ملک بھر سے تمام مکاتب فکر کے علماء نے شرکت کی۔

وزیر اعظم شہباز شریف نے کہا کہ موجودہ دور میں سیاسی حکومت اور آئینی اداروں کے درمیان تعاون کی فضا پہلے کبھی نہ دیکھی گئی۔ انہوں نے اس بات کا ذکر کیا کہ سپہ سالار جنرل عاصم منیر کی تقریر نے قرآن کریم اور احادیث کی روشنی میں جامع گفتگو کی، جو کہ قوم کے لیے مشعل راہ ہے۔

شہباز شریف نے اس موقع پر ملک کی آزادی اور اس کی تشکیل کے لیے کی جانے والی قربانیوں کا ذکر کیا اور کہا کہ آج ہمیں قومی یکجہتی اور اتحاد کی ضرورت ہے۔ انہوں نے کہا کہ موجودہ اقتصادی چیلنجز سنگین ہیں اور ان سے نمٹنے کے لیے حکومت دن رات کام کر رہی ہے۔

وزیر اعظم نے کہا کہ ملک میں اسلامی لبادے میں دشمنی کرنے والے عناصر کے مقابلے میں ہمیں متحد ہونا ہے اور ملکی قرضوں سے نجات حاصل کرنی ہے۔

انہوں نے مزید کہا کہ حکومت نے ترقیاتی کاموں کے بجٹ سے 200 یونٹ ماہانہ استعمال کرنے والے بجلی صارفین کے لیے 50 ارب روپے مختص کیے ہیں اور 200 سے 500 یونٹ تک بجلی استعمال کرنے والے صارفین کے لیے بھی ریلیف فراہم کرنے کا جامع منصوبہ بنایا جا رہا ہے۔

وزیر اعظم شہباز شریف نے کہا کہ عوامی خدمت اور اقتصادی مشکلات سے نمٹنے کے لیے حکومت اور اتحادیوں کے درمیان مشاورت جاری ہے اور امید ہے کہ مستقبل قریب میں مہنگائی اور بجلی کی قیمتوں میں مزید کمی آئے گی۔