وزیر دفاع کا نیول ہیڈ کوارٹرز کا دورہ اور نیول چیف سے ملاقات

اسلام آباد: وزیر دفاع خواجہ آصف نے نیول ہیڈ کوارٹرز اسلام آباد کا دورہ کیا اور چیف آف دی نیول اسٹاف ایڈمرل نوید اشرف سے ملاقات کی۔
 
ملاقات کے دوران پیچیدہ علاقائی میری ٹائم سیکیورٹی صورتحال اور پاک بحریہ کی آپریشنل تیاریوں سے متعلق امور پر تبادلہ خیال کیا گیا۔ نیول چیف نے وزیر دفاع کو میری ٹائم چیلنجز، ان سے نمٹنے کے لیے پاک بحریہ کی منصوبہ بندی اور آپریشنل استعداد پر بریفنگ دی۔ 

وزیر دفاع کو پاک بحریہ میں جاری مستقبل کے منصوبوں سے بھی آگاہ کیا گیا۔ علاوہ ازیں  ملک کے ناقابل تسخیر سمندری دفاع کو یقینی بنانے کے لیے پاک بحریہ میں جدید ترین پلیٹ فارمز اور آلات کی حالیہ شمولیت کے بارے میں بھی بریفنگ دی گئی۔

وزیر دفاع نے ملک کے بحری مفادات کے تحفظ کے لیے پاک بحریہ کی اہمیت کو سراہا۔ انہوں نے پاکستان بحریہ میں شامل ہونے والے جدید جنگی بحری جہازوں اور جاری دیگر منصوبوں میں خصوصی دلچسپی کا اظہار کیا۔ 

انہوں نے پاکستان بحریہ کو کم وسائل کے باوجود جدید ٹیکنالوجی اور پیشہ وارانہ مہارت میں عبور حاصل کرنے پر مبارکباد بھی دی۔ انہوں نے یقین دلایا کہ ان کی وزارت موجودہ اقتصادی مشکلات کے باوجود پاک بحریہ کی ضروریات کو پورا کرنے کے لیے ہر ممکن کوشش کرے گی۔