بھارت میں فارماسیوٹیکل پلانٹ میں دھماکا: 17 ہلاک، درجنوں زخمی

بھارتی ریاست آندھرا پردیش کے اچوتاپورم اسپیشل اکنامک زون میں واقع ایک فارماسیوٹیکل پلانٹ میں زوردار دھماکا ہوا ہے جس کے نتیجے میں کم از کم 17 افراد ہلاک اور 41 زخمی ہو گئے ہیں۔ 

واقعہ گزشتہ روز دوپہر سوا دو بجے کے قریب پیش آیا جب پلانٹ میں کام کرنے والے مزدور کھانے کے وقفے پر تھے۔ ابتدائی اطلاعات کے مطابق دھماکا بجلی کے شارٹ سرکٹ کی وجہ سے ہوا تاہم اس کی تصدیق کے لیے مزید تحقیقات کی جا رہی ہیں۔

40 ایکڑ پر محیط اور 200 کروڑ بھارتی روپے کی لاگت سے بننے والا یہ پلانٹ کیمیائی مواد اور فارما کی دوائیوں کے اجزا تیار کرتا تھا۔پلانٹ میں دو شفٹوں میں کُل 380 ملازم کام کرتے تھے۔

واقعے کے بعد پلانٹ مکمل طور پر تباہ ہو گیا ہے۔ دھماکے کی آواز دور دور تک سنی گئی اور علاقے میں ہڑکمپ مچ گیا۔ 

بھارتی حکومت نے واقعے کا نوٹس لیتے ہوئے اعلیٰ سطحی تحقیقات کا حکم دیا ہے۔ ریاستی حکومت نے متاثرہ خاندانوں کو ہر ممکن امداد کا یقین دلایا ہے۔