تاجروں کی ملک گیر ہڑتال، کاروباری مراکز بند

کراچی: بجلی کے بلوں اور ٹیکسوں میں اضافے کے خلاف ملک بھر میں تاجر تنظیموں کی جانب سے آج ملک گیر ہڑتال جاری  ہے۔ اس ہڑتال کے باعث ملک کے مختلف شہروں میں کاروباری مراکز بند ہیں اور بہت سے سکول بھی بند رکھے گئے ہیں۔

تاجر تنظیموں کی اس ہڑتال کو جماعت اسلامی اور جمعیت  علمائے اسلام سمیت مختلف سیاسی جماعتوں کی جانب سے حمایت حاصل ہے۔ اسلام آباد میں انتظامیہ نے احتجاج کے پیش نظر ریڈ زون کی طرف جانے والے راستوں کو کنٹینرز سے بند کر دیا ہے۔

تاجر تنظیموں کا کہنا ہے کہ بجلی کے بلوں اور ٹیکسوں میں اضافے سے ان کا کاروبار بری طرح متاثر ہو رہا ہے۔ انہوں نے حکومت سے مطالبہ کیا ہے کہ بجلی کی قیمتوں میں اضافہ واپس لیا جائے اور ٹیکسوں کی شرح کم کی جائے۔

لاہور میں تاجر تنظیمیں اس ہڑتال کے معاملے پر دو دھڑوں میں بٹ گئی ہیں۔ ایک دھڑا ہڑتال کا حامی ہے جبکہ دوسرا گروپ اس کا مخالف ہے۔

بھاری بھرکم بجلی کے بلوں اور ٹیکسوں کے خلاف تاجروں کی ہڑتال!!#GNN #BreakingNews #NewsUpdates #GNN_Updates pic.twitter.com/j26vQobjEu

— GNN (@gnnhdofficial) August 28, 2024

صدر انجمن تاجران کراچی جاوید شمس کا کہنا ہے کہ سیاسی قیادت ناکام ہو چکی ہے اور آج مکمل ہڑتال ہو گی۔ آل پاکستان انجمن تاجران سندھ کے صدر نے بھی آج شٹر ڈاؤن ہڑتال کی مکمل حمایت کا اعلان کیا ہے۔ انہوں نے کہا کہ سندھ کے تمام چھوٹے بڑے شہروں میں کاروبار مکمل بند رہے گا۔

کراچی الیکٹرانکس ڈیلرز ایسوسی ایشن کے صدر محمد رضوان نے کہا کہ کراچی سے خیبر تک تمام تاجر تنظیمیں ہڑتال میں شامل ہیں۔ انہوں نے کہا کہ اگر مسائل حل نہ ہوئے تو ہڑتال کا دورانیہ بڑھ سکتا ہے۔

صدر آل کراچی تاجر اتحاد عتیق میر نے کہا کہ یہ تاجروں کی نہیں بلکہ شہریوں کی ہڑتال ہے۔ انہوں نے کہا کہ عام آدمی مہنگائی سے پریشان ہے۔

پشاور میں بھی تاجروں نے مختلف بازار بند رکھے ہوئے ہیں۔ تاجر یونینز نے مطالبہ کیا ہے کہ بجلی کی قیمتوں میں اضافہ واپس لیا جائے اور ٹیکس کی شرح کم کی جائے۔