وزارت خزانہ کی جانب سے ماہانہ معاشی آؤٹ لک جاری

وزارت خزانہ کی جانب سے ماہانہ معاشی آؤٹ لک جاری کردیا گیا ہے۔

 رپورٹ کے مطابق رواں مالی سال کے پہلے ماہ جولائی میں ترسیلات زر، برآمدات، درآمدات میں اضافہ ریکارڈ ہوا جبکہ ایف بی آر محصولات، نان ٹیکس آمدنی، مالی ذخائر اور روپے کی قدر میں بھی اضافہ دیکھا گیا۔

رپورٹ میں بتایا گیا کہ کرنٹ اکاؤنٹ خسارے، مہنگائی میں کمی ریکارڈ کی گئی جبکہ رواں مالی سال جولائی میں ترسیلات 47.6 فیصد اضافے سے 3 ارب ڈالر رہیں۔

 جولائی 2024 میں برآمدات 12.9 فیصد اضافے سے 2.4 ارب ڈالر کی رہیں جبکہ رواں مالی سال درآمدات 16.3 فیصد اضافے سے 4.8 ارب ڈالر کی رہیں۔

براہ راست غیر ملکی سرمایہ کاری میں 63.8 فیصد کا اضافہ ریکارڈ کیا گیا جبکہ کل بیرونی سرمایہ کاری میں 189.1 فیصد کا اضافہ ریکارڈ کیا گیا۔

رپورٹ کے مطابق 23 اگست 2024 تک مالی ذخائر 14.77 ارب ڈالر کے رہے جبکہ گزشتہ مالی سال اسی عرصے میں 13.17 ارب ڈالر کے مالی ذخائر تھے۔

رپورٹ میں بتایا گیا کہ جولائی 2024 میں ایف بی آر محصولات میں 22.7 فیصد کا اضافہ ہوا جبکہ گزشتہ مالی سال نان ٹیکس آمدنی میں 78.3 فیصد کا اضافہ ہوا۔

وزارت خزانہ کی جانب سے جاری کردہ رپورٹ کے مطابق گزشتہ مالی سال مالی خسارے میں 10.5 فیصد کا اضافہ ہوا جبکہ جولائی 2024 میں مہنگائی کی شرح 11.1 فیصد ریکارڈ کی گئی۔

واضح رہے کہ گزشتہ مالی سال جولائی میں مہنگائی کی شرح 28.3 فیصد تھی۔