تمام سیاسی قوتین ریاستی رٹ کو چیلنج کرنے والوں کے خلاف متحد ہو جائیں، وزیرداخلہ

وزیر داخلہ محسن نقوی نے تمام سیاسی قوتوں پر زور دیا ہے کہ وہ ریاستی رٹ کو چیلنج کرنے والوں کے خلاف متحد ہو جائیں۔

سینیٹ اجلاس کے دوران سینیٹرز کی جانب سے اٹھائے گئے مختلف نکات کا جواب دیتے ہوئے انہوں نے کہا کہ ریاست کو قبول کرنے والا ہر شخص اہم ہے اور ہم ان کی تشویش کا ازالہ کریں گے تاہم کسی کو ریاست کے خلاف بندوق اٹھانے کی اجازت نہیں دی جائے گی۔

وزیر داخلہ نے ایوان کو بتایا کہ وزیر اعظم شہباز شریف نے اپنے حالیہ دورہ کوئٹہ کے دوران بلوچستان کے تمام شراکت داروں سے ان کے مسائل کے حل کے لیے ملاقاتیں کیں۔

انہوں نے کہا کہ چھبیس اگست کی رات ہونے والے حملے کا مقصد ایس سی او کونسل آف ہیڈز آف گورنمنٹ کے اجلاس کو سبوتاژ کرنا تھا، جو اکتوبر میں پاکستان میں منعقد ہوگا۔

ایوان کی کارروائی پیر کی شام پانچ بجے تک ملتوی کر دی گئی۔