لاہور میں اسموگ کی شرح میں اضافہ ہونے لگا

پنجاب کی سینئر صوبائی وزیر مریم اورنگزیب نے کہا ہے کہ لاہور میں اسموگ کی شرح مضر صحت، جان لیوا اور خطرناک ہے۔

سینئر صوبائی وزیر مریم اورنگزیب نے میڈیا سے گفتگو کرتے ہوئے کہا کہ لاہور کے لوگ اسموگ سے اچھی طرح واقف ہیں، گزشتہ سالوں سے اسموگ کا معاملہ شروع ہوا جو بڑھتا گیا۔

انہوں نے کہا کہ لاہور کے اضلاع کا ایئر کوالٹی انڈیکس خطرناک حد تک پہنچ گیا، لاہور میں اسموگ کی شرح مضر صحت، جان لیوا اور خطرناک ہے۔

ان کا کہنا تھا کہ لاہور میں اسموگ ساڑھے 400 انڈیکس تک بھی گیا ہے، اسموگ کا 150 سے زیادہ انڈیکس جان لیوا ثابت ہوسکتا ہے، قصور، شیخوپورہ اب نارووال بھی اسموگ کی لپیٹ میں آرہا ہے۔

مریم اورنگزیب نے کہا کہ اسموگ لاہور کے اندر جمع ہو کر سردی میں متاثر کرتی ہے، اسموگ میں جان لیوا کینسر کے اثرات بھی پائے جاتے ہیں۔