لاہور ،فیصل آباد میں ویکسین کی عدم دستیابی کے باعث شہری سراپا احتجاج

جی این این کے مطابق لاہور کے  سب سے بڑے مرکز ایکسپو سنٹر میں  آسٹرازینکا ویکسین کی کمی کی وجہ سے بیرون ملک جانیوالے شہری آپے سے باہر ہوگئے ۔ احتجاج کرتے ہوئے ایکسپو سینٹر کے ہال نمبر 3 میں گھس آئے اورانتظامیہ سے تلخ کلامی کی ، درجنوں افراد نے متعلقہ حکام کے خلاف احتجاج کیا۔ بیرون ملک جانے والے افراد نے مطالبہ کیا کہ " ہمیں ہر صورت آسٹرا زینیکا لگائی جائے ، ہمارے ویزے اور ٹکٹ ایکسپائر ہورہے ہیں ، آسٹرا زینیکا جب تک نہیں لگے گی ہم یہیں رہیں گے۔" شہری آسٹزینیکا لگوا کر ہی باہر جانے پر بضد رہے ، انتظامیہ نے مظاہرین کوبتایا کہ عام شہریوں کو سائنو ویک اور سائنو فام لگائی جارہی ہے ۔

فیصل آباد میں بھی شہری مختلف مراکز میں کورونا وائرس ویکسین کی کمی پر احتجاج کر رہے ہیں۔ اوور سیز پاکستانیوں کا احتجاج کرتے ہوئے کہنا تھا کہ " ہم آٹھ دن سے مسلسل ویکسین سنٹر آرہے ہیں ، روزانہ اگلے دن کا کہا جاتا ہے، ویزے ختم ہورہے ہیں اور ہمیں ویکسین نہیں مل رہی ہے" ۔  اوور سیز پاکستانیوں نے ویکسین سنٹر کے باہر سڑک بلاک کردی۔

دوسری جانب تین دن کی قلت کے بعد آج کراچی کے تمام مراکز میں ویکسین  سے بچاؤ کی ویکسی نیشن کا عمل بحال کردیا گیا ہے۔

خیال رہے کہ  کچھ روز قبل  لاہور میں کورونا ویکسین کی قلت کا معاملہ سامنے آیا تھا اورکورونا ویکسین ختم ہونے پر  لاہور کے ایکسپو سینٹر کے باہر شہریوں کا رش  دیکھا گیا    تھا ۔ ذرائع کے مطابق پنجاب حکومت کے پاس صرف 3روز کا اسٹاک رہ گیاہے اور مزید ویکسی نیشن کی ڈیمانڈ کردی گئی ہے ۔

 ملک بھر میں کورونا ویکسی نیشن کا عمل جاری ہے،ملک میں اب تک مجموعی طور پر ایک کروڑ 29 لاکھ 77ہزار 740خوراکیں استعمال کی جاچکی ہیں ۔