جنیوا: کشمیریوں کااقوام متحدہ کےدفتر کےباہر بھارت کیخلاف احتجاجی مظاہرہ

جنیوا :یورپ بھر سے آئے ہوئے کشمیریوں نے جنیوا میں اقوام متحدہ کے دفتر کے باہر بھارت کے خلاف احتجاجی مظاہرہ کیا ہے۔ مظاہرین نے مودی سرکار کی کشمیر دشمن پالیسیوں اور مقبوضہ کشمیر میں انسانی حقوق کی سنگین خلاف ورزیوں کی شدید مذمت کی۔

مظاہرین نے ہاتھوں میں کشمیری شہدا کی تصاویر اور بھارت مخالف نعروں والے پلے کارڈز اٹھا رکھے تھے۔ مظاہرین نے مقبوضہ کشمیر میں گرفتار حریت رہنماؤں کی فوری رہائی کا بھی مطالبہ کیا۔

مظاہرے سے خطاب کرتے ہوئے اٹلی، فرانس، بلجیم، جرمنی، اسپین، برطانیہ اور سوئٹزرلینڈ کے کشمیری تارکین وطن کے رہنماؤں نے اقوام متحدہ کے انسانی حقوق کمیشن سے مقبوضہ کشمیر میں انسانی حقوق کی سنگین خلاف ورزیوں کا نوٹس لینے اور کشمیریوں کو ان کا حق خود ارادیت دینے کا مطالبہ کیا۔

مظاہرین نے کہا کہ بھارتی حکومت کشمیر میں انسانی حقوق کی سنگین خلاف ورزیاں کر رہی ہے اور کشمیری عوام کو ظلم و ستم کا نشانہ بنا رہی ہے۔ انہوں نے بین الاقوامی برادری سے مطالبہ کیا کہ وہ مقبوضہ کشمیر میں انسانی حقوق کی صورتحال پر فوری نوٹس لے اور بھارت کو کشمیر میں انسانی حقوق کی خلاف ورزیوں سے باز رکھنے پر مجبور کرے۔