ویکسین لگوائیں یا جیل جائیں ، فلپائن کے صدر کا حیران کن اعلان

غیر ملکی خبر رساں ادارے کے مطابق فلپائن میں برھتے ہوئے کورونا وائرس کی وجہ سے اور عوام کی جانب سے ویکسین لگوانے میں ہچکچاہٹ اور مزاحمت دکھانے پر صدر روڈریگو دوتیر نے اعلان کیا ہے کہ "آپ کے پاس دو آپشنز ہیں، ویکسین لگوائیں یا جیل جائیں "۔

فلپائن صدر نے اپنے خطاب میں کہا کہ  ہم نے ویکسین لگانے کا پروگرام مارچ میں شروع کیا تھا لیکن ملک کے کئی ویکسینیشن مراکز سے کم ٹرن آؤٹ ہونے کی اطلاعات موصول ہو رہی ہیں ، حالانکہ مبینہ طور پر لوگ بھی فائزر بائیو نٹیک ویکسین لگوانے کے لیے زیادہ کوشش کر رہے ہیں۔

فلپائن کے صدر نے اعتراف کیا کہ ویکسین لگوانے سے انکار کرنے والے بے وقوفوں کی وجہ سے انہیں شدید غصہ ہے۔ ان سب ضدیوں نے اگر اب بھی ویکسین لگوانے سے انکار کیا تو سور کو بے ہوش کرنے والے شاٹس سے ان لوگوں کو بے ہوش کرکے ویکسین لگواؤں گا۔

صدر روڈریگو دوتیرتے کی اس غصے کی وجہ ملک میں بھارت سے آنے والے کورونا وائرس کی نئی قسم ڈیلٹا وائرس کا تیزی سے پھیلنا ہے جس سے اموات میں بھی اضافہ ہوا ہے اور اسپتالوں میں مریضوں کے لیے جگہ باقی نہیں بچی ہے۔

یاد رہےاس سے قبل بھی فلپائن کے صدر کورونا ایس او پیز کی خلاف ورزی کرنے والوں کو گولی مارنے کی دھمکی دے چکے ہیں جس کے بعد سیکیورٹی حکام کی جانب سے تین افراد پر گولی چلانے کا واقعہ رونما ہوا تھا ۔

واضح رہے کہ فلپائن میں ویکسینیشن کا آغاز رواں برس مارچ سے ہوچکا ہے تاہم اب تک صرف ایک فیصد عوام نے ویکسین لگوائی ہے جس کی وجہ حکومت پر اعتماد نہ ہونے، سازشی نظریات اور غیر حقیقی خوف ہے۔