پی ٹی ایم کے حملوں میں افغان باشندے ملوث ہیں ، وزیر اطلاعات

وفاقی وزیراطلاعات عطاء اللہ تارڑ نے کہا ہے پی ٹی ایم کے حملوں میں افغان باشندے ملوث پائے گئے  ہیں۔ 

تفصیلات کےمطابق  وفاقی وزیراطلاعات عطاء اللہ تارڑ نے میڈیا سے گفتگو کرتے ہوئے کہا ہے پشتون تحفظ موومنٹ کی گزشتہ چھ ماہ کی سرگرمیاں ملک کے خلاف رہیں، پشتون تحفظ موومنٹ نے نہ صرف پاکستانی پرچم نذر آتش کیا بلکہ بیرون ممالک پاکستان کے سفارت خانوں پر حملے کئے۔ 

انہوں نے کہا پاکستان کی معیشت مستحکم ہو رہی ہے، روپے کی قدر میں اضافہ اور مہنگائی میں کمی ہوئی ہے، پختون ہمارے بھائی ہیں، پختونوں کا پاکستان کی ترقی میں اہم کردار رہا ہے، کسی بھی تنظیم کو ثبوتوں کی بنیاد پر ہی کالعدم قرار دیا جاتا ہے، کسی بھی سیاسی جماعت کو پاکستان پر حملے کی اجازت نہیں دی جا سکتی، نظریہ پاکستان کو نقصان پہنچانے کی اجازت نہیں دی جا سکتی، پرامن احتجاج کی ہر کسی کو اجازت ہے، پاکستان کی ترقی کے لئے ہر اقدام اٹھائیں گے، کسی کو اجازت نہیں دیں گے کہ وہ ملک کو عدم استحکام کا شکار کرے ۔ 

پشتون تحفظ موومنٹ کو بیرون ملک سے پاکستان مخالف بیانیہ پر فنڈنگ کی جا رہی تھی، پی ٹی ایم کے حملوں میں افغان باشندے ملوث پائے گئے،سب چیزیں ثابت ہونے پر پی ٹی ایم پر پابندی عائد کی گئی ،تحقیقت ہو رہی ہیں کہ پی ٹی ایم کو فنڈز کہاں سے آ رہے ہیں ۔ 

ابھی بھی وقت ہے قومی دھارے میں واپس آئیں، پاکستان کی ترقی کے لئے کردار ادا کریں، پاکستان سے ہماری بقاءہے اور پاکستان ہے تو ہم سب ہیں ۔ 

عطاء تارڑ کا مزید کہناتھا ہمارے معاشی اشاریئے بہتر ہو رہے ہیں، عالمی مالیاتی ادارے ہماری معاشی اقدامات کی تعریف کر رہے ہیں، وزیراعظم نے تمام وزراءاعلیٰ سے کہا ہے کہ مہنگائی میں کمی کے اثرات عوام کو منتقل کریں، جب کوئی پابندی عائد کی جاتی ہے تو وہ شواہد پر لگائی جاتی ہے۔