مقبوضہ کشمیر میں مقید حریت قیادت کی اپیل پر کشمیری آج یوم سیاہ منا رہے ہیں

مقبوضہ کشمیر میں مقید حریت قیادت کی اپیل پر کشمیری آج یوم سیاہ منا رہے ہیں۔

 یوم سیاہ کا مقصد بھارت اور عالمی برادری کو یہ واضح پیغام دینا ہے کہ کشمیری اپنے مادر وطن پربھارت کے غیر قانونی قبضے کو مسترد کرتے ہیں اور وہ اپنے پیدائشی حق، حق خود ارادیت کے حصول تک اپنی جدوجہد جاری رکھیں گے۔

کشمیر میڈیا سروس کے مطابق مقبوضہ جموں و کشمیر میں آج مکمل ہڑتال کی جارہی ہے۔یوم سیاہ اور ہرتال کی کال کل جماعتی حریت کانفرنس نے دی ہے۔ غیر قانونی طور پر نظر بند کل جماعتی حریت کانفرنس کے چیئرمین مسرت عالم بٹ اور سینئر رہنما شبیر احمد شاہ نے نئی دلی کی تہاڑ جیل سے اپنے پیغامات میں کہا کہ بھارت نے 27 اکتوبر 1947 کو جموں و کشمیر پر فوجی یلغار کر کے ایک بڑی جارحیت کی ہے۔

کشمیری رہنماؤں کا کہنا تھا کہ جموں وکشمیر پر بھارتی قبضے سے نہ صرف کشمیریوں کی شناخت خطرے سے دوچار ہے بلکہ پورے خطے کا امن و استحکام دائو پر لگا ہوا ہے۔کشمیریوں نے بھارتی تسلط کو کبھی تسلیم نہیں کیا اور وہ اسکے خلاف اپنی جدوجہد ہرقیمت پر جاری رکھیں گے۔

بھارت نے 27اکتوبر 1947کو تقسیم برصغیر کے فارمولے کی خلاف ورزی کرتے ہوئے اورکشمیری عوام کی مرضی کے برخلاف جموںوکشمیر میں اپنی فوجیں اتارکر علاقے پر غیر قانونی قبضہ کیاتھا۔ یوم سیاہ کے موقع پر پوری دنیا میں کشمیری احتجاجی مارچوں ، ریلیوں اور سیمینارز کا انعقاد کریں گے۔

دوسری طرف مقبوضہ جموں وکشمیر میں بھارتی فورسز کی طرف سے محاصرے اور تلاشی کی کارروائیوں کا سلسلہ تیز کر دیا گیا۔

کشمیر میڈیا سروس کے مطابق فوجیوں نے آج تلاشی کی کارروائی دوبارہ شروع کر دی ہے جسے عارضی طور پر روک دیا گیا تھا۔بھارتی فورسزنے جمعہ کے روز کنٹرول لائن کے گلمرگ سیکٹر اور قریبی علاقوں میں فوجی آپریشن کے دوران ڈرونز اور ہیلی کاپٹروں کابھی استعمال کیا۔آخری اطلاعات آنے تک علاقے میں فوجی آپریشن جاری تھا۔

بھارتی فوجی گھروں میں گھس کر خواتین اور بچوں کو ہراساں کر رہے ہیں۔