سعودی عرب، قطر کشکول نہیں بلکہ  سرمایہ کاری کے منصوبے لے کر جاؤں گا، شہباز شریف

وزیر اعظم شہباز شریف کا کہنا ہے کہ وہ سعودی عرب اور قطر گئے تو وہاں بتایا کہ آپ نے پاکستان کی ہمیشہ مدد کی ہے، لیکن اب آپ کے پاس کشکول لیکر نہیں آؤں گا بلکہ آپ کے پاس پروگرام لیکر آؤں گا،  ان کا مزید کہنا تھا کہ  پاکستان کی معیشت بہتر ہورہی ہے، مہنگائی 32 فیصد سے 6 اعشاریہ 7 فیصد پر پہنچ گئی ہے، جبکہ شرح سود 22 فیصدکم ہو کر 15فیصد پر آگئی ہے، برآمدات بڑھیں اور صنعتیں چلیں گی، روزگار کے مواقع ملیں گے۔

یوم اقبال پر تقریب سے خطاب میں انہوں نے مزید کہا کہ سعودی اور قطر کی قیادت کو بتایا کہ پاکستان قدرتی دولت سے مالا مال ہے، اس میں سرمایہ کاری کریں، منافع کمائیں، اس سے پاکستان بھی ترقی کی جانب گامزن ہو گا۔

وزیر اعظم کا کہنا تھا کہ وہ یہ پیغام ہر جگہ جا کر دیتے ہیں، یہ صرف لفاظی نہیں ہے، ہم سب مل کر یہ کریں گے اور پاکستان کو عظیم بنائیں گے۔

اس موقع پر وزیر اعظم کا مزید کہنا تھا کہ پنجاب میں پسماندہ طلباء کو مواقع فراہم کیے جاتے ہیں، اگر ان قابل بچوں کو مواقع نہ دیئے جاتے تو وہ سڑکوں پر ہوتے۔ہزاروں لڑکے اور لڑکیاں تعلیم حاصل کر کے ڈاکٹر اور انجینئر بن چکے ہیں۔ طلباء کو لاکھوں لیپ ٹاپ دئیے گئے ہیں۔ اسی سے قومیں بنتی ہیں۔ ملک کے لاکھوں بچوں کو بہترین تعلیم فراہم کی جائے گی۔