سعودی عرب : خوش نصیب عازمین حج کے ناموں کا اعلان آج ہوگا

تفصیلات کے مطابق  سعودی عرب میں وزارت حج و عمرہ  آج رواں برس حج کرنے والے عازمین کے ناموں کا اعلان کرے گی ، اس حوالے سےسعودی وزارت حج کو 150ممالک کے 6لاکھ سے زائد عازمین حج کی درخواستیں موصول ہوئی ہیں ۔ وزارت حج و عمرہ کے مطابق 60ہزارخوش نصیبوں کے ناموں کااعلان آج دوپہرکوکیا جائے گا ،  جبکہ تمام کارروائی کمپیوٹر سسٹم کے ذریعے ہی ہوگی ۔ اس سلسلےمیں  انتخاب کے جو ضوابط وزارت نے مقرر کئے ہیں ،ان ہی اصولوں کی بنیاد پر اجازت نامے جاری ہوں گے ۔

رواں برس 6لاکھ سے زائدسعودی شہری اورمقیم غیرملکی آن لائن حج درخواستیں جمع کرا چکےہیں،  درخواست گزاروں میں 150 ممالک سے تعلق رکھنے والے باشندے شامل ہیں جن میں 59 فیصد مرد اور 41 فیصد خواتین شامل ہیں ۔ سعودی حکومت نے  کورونا کے باعث   صرف 60 ہزارافراد کو حج کرنے کی اجازت دی ہے ۔ اور اس سال بھی سعودی شہری اور مقیم غیرملکی حج ادا کرسکیں گے۔

صحت مند نظام کو مدنظر رکھتے ہوئے مقررہ ضوابط کی پابندی کی جائے گی، حج2021 کے منتخب خوش نصیب اپنے پیکج کے تحت فوری بکنگ کرواسکیں گے، منتخب افراد کو 15سے29ذی القعد رات10بجے تک اپنا پیکج خریدنا ہوگا۔