کراچی : ایم اے جناح روڈ  پر واقع رمپا پلازہ میں لگنے والی آگ پر قابو پالیا  گیا

کراچی کے ایم اے جناح روڈ پر واقع رمپا پلازہ میں لگنے والی  خوفناک آگ پر قابو پا لیا گیا۔

میڈیا ذرائع کے مطابق کراچی کے علاقے صدر میں ایم اے جناح روڈ پر واقع رِمپا پلازا  کی چوتھی منزل میں آگ لگی جو شدت اختیار کرگئی۔

واقعے کی اطلاع ملتے ہی فائر  بریگیڈ اور  ریسکیو  کی ٹیمیں فوری طور پر جائے وقوعہ پر پہنچ گئی، محکمہ فائربریگیڈ کے عملے نے 6 فائر ٹینڈرز اور 2 اسنارکل کی مدد سے  لگی آگ بجھانے کی کوششیں شروع کردیں جبکہ عمارت کی چوتھی منزل پر پھنسے افراد کو ریسکیو کرنے کے لیے عمارت کے شیشے توڑ دیے گئے۔

دوسری جانب وزیر اعلیٰ سندھ مراد علی شاہ نے واقعے کا نوٹس لیتے ہوئے آگ پر فوری قابو پانے کے لیے ضروری  اقدامات کی ہدایت کی تھی ،اور فوری طور کمشنر کراچی سے  رمپا پلازہ میں آگ لگنےکی تفصیلی مانگی۔

 فائر بریگیڈ حکام  کے مطابق آگ عمارت کی چوتھی اور پانچویں منزل پر ربڑ اور پلاسٹک کے آٹو پارٹس گودام میں لگی، ان کا کہنا تھا کہ  آگ سے کوئی جانی نقصان نہیں ہوا، اور عمارت سے تمام افراد کو باحفاظت نکال لیا گیا۔

 ان کا مزید کہنا تھا کہ آپریشن میں کے ایم سی، پاک بحریہ اور 1122 کی ریسکیو ٹیموں نے حصہ لیا۔