احسن اقبال نے کراچی تا حیدرآباد نئی موٹروے بنانے کا اعلان کردیا

وفاقی وزیر احسن اقبال نے سائٹ لمیٹڈ سے خطاب میں کراچی تا حیدرآباد نئی موٹروے بنانے کا اعلان کردیا۔

سائٹ لمیٹڈ میں وفاقی وزیر منصوبہ بندی احسن اقبال نے خطاب کرتے ہوئے کہا کہ وفاقی حکومت نے سائٹ کے لئے 5 ارب کا منصوبہ منظورکیا ہے، جس کا وعدہ وزیراعظم نے کیا تھا اور اسی منصوبے کا جائزہ لینے آیا تھا۔

وفاقی وزیر نے بتایا کہ 5 سالہ منصوبہ پاکستان کو مضبوط بنائے گا جس کا اعلان وزیراعظم اسی مہینے کریں گے، ایکسپورٹرز کو کہتا ہوں حکومت آپ کی پشت پر کھڑی ہوگی۔ ہم آئی ایم ایف پروگرام میں ہیں، مایوسی کے بادل چھٹ جائیں گے۔

احسن اقبال نے کہا کہ 5 ارب روپے کا منصوبہ معاشی ترقی کی سوچ کا مظہر ہے، پاکستان کو برآمد کرنے والا ملک بنانا ہے اور پاکستان کی ترقی کے لئے صنعتی پیداوار بڑھانی ہوگی۔

وفاقی وزیر منصوبہ بندی کہتے ہیں کہ ملک سے انتشارختم کرکے ترقی کی راہ پر گامزن ہیں، چین نے 30 رکنی پاکستانی ماہرین کے وفد کو مدعو کیا ہے۔ پاکستانی وفد 10 سے 23 دسمبر کو چین کا 2 ہفتوں کا دورہ کرے گا۔