بنگلہ دیشی دارالحکومت میں دھماکہ، 7افراد ہلاک ، 70 زخمی

تفصیلات کے مطابق بنگلہ دیش کے دارالحکومت  ڈھاکہ میں خوفناک دھماکے سے 7افراد ہلاک اور 70سے زائد زخمی ہوگئے،غیر ملکی میڈیا کے مطابق  یہ دھماکہ  موغبازار کے علاقے میں  وائرلیس گیٹ کے قریب  4منزلہ عمارت میں ہوا ، دھماکہ گزشتہ رات 8بجے ہوا ،  پولیس کے مطابق  دھماکےکی فوری طورپرنوعیت معلوم نہیں ہوسکی، دھماکےکے نتیجے میں متعدد گاڑیوں اور ملحقہ عمارتوں کو  نقصان پہنچا۔دھماکے سے اطراف میں موجود درجنوں افراد زخمی ہوگئے۔

ڈھاکامیٹروپولیٹن پولیس کے مطابق زخمیوں کومختلف اسپتالوں میں منتقل کردیاگیا ہے ۔ جن میں 29ڈھاکہ میڈیکل کالج ہسپتال جبکہ 10 کو شیخ حسینہ  نیشنل برن ہسپتال منتقل کیا گیا ۔

ڈھاکہ میٹرو پولیٹن پولیس کمشنر شفیق الاسلام نے رات دس بج کر دس منٹ پر جائے وقوعہ موقع کا دورہ کیا اور بتایا کہ دھماکے میں کم از کم سات افراد ہلاک ہوئے ہیں ۔ ان کاکہنا تھا کہ ابتدائی طور پر  واقعے میں دہشت گردی  یا بم دھماکے کا کوئی ثبوت نہیں ملا ہے تاہم یہ دھماکہ گیس سلنڈر  پھٹنے کی وجہ سے بھی ہوسکتا ہے ۔