پی ٹی آئی صوبائیت کارڈ کھیل رہی  ہے، میں چیلنج کرتا ہو ں سول نافرمانی کی تحریک ناکام ہو گی، خواجہ آصف

 وزیردفاع خواجہ آصف نے کہا ہے کہ کہ احتجاج میں ناکامی  کے بعد پی ٹی آئی نے صوبائیت کا نیا کارڈ کھیلنا شروع کردیا ہے، میں ان کو چیلنج کرتا ہوں ان سول نافرمانی کی تحریک ناکام ہو گی۔

وزیر دفاع خواجہ آصف نے قومی اسمبلی اجلاس میں اظہار خیال کرتے ہوئے کہا کہ لطیف کھوسہ نے 278 افراد کا دعویٰ کیا تھا، ایوان میں بیٹھے پی ٹی آئی کے لوگ مختلف تعداد بتاتے رہے ہیں، جن 12 افراد کا ذکر کیا ان کے ابھی تک ان کے شناختی کارڈ، قبریں، ورثا کوئی سامنے نہیں آیا، وزیراعلی خیبرپختونخوا علی امین گنڈاپورکے گارڈز نے پی ٹی آئی کارکنان پر فائرنگ کی۔

علی امین گنڈا پور پر تنقید کرتے ہوئے خواجہ آصف نے کہا کہ وزیراعلیٰ امین گنڈا پور نے تین مرتبہ مونال کے راستے بارہ ضلع کراس کیے اب سول نافرمانی کا اعلان کیا ہے، میں ان کو چیلنج کرتا ہوں کہ یہ اپنے اعلان پر کھڑے رہیں،انہوں نے کہا کہ صوبائیت کا کارڈ کھیلنے سے زیادہ گھٹیا حرکت کیا ہوسکتی ہے اس کا انحصار ڈی این اے پر ہوتا ہے،اگر ڈی این اے میں آمریت کے جراثیم ہوں تو ایسے الفاظ استعمال کرتے ہیں ان کی سول نافرمانی کا اعلان بھی ناکام ہوگا۔

اپوزیشن لیڈر عمر ایوب پر تنقید کرتے ہوئے ان کا کہنا تھا کہ ، ایک شخص ہمارے یہاں حکمران تھا جس کا نام ایوب خان تھا، بنگلہ دیش بننے کی ذمہ داری اس پر عائد ہوتی ہے، آج ان کے رشتہ دار یہاں پر صوبائیت کا کارڈ کھیل رہے ہیں۔

وزیر دفاع کا کہنا تھا کہ پی ٹی آئی اپنی ذمہ داریاں چھوڑ کر وفاق میں احتجاج کرنے آتی ہے اور ان کا ایجنڈا ملک دشمنی کا ہے، جسے ہم کامیاب نہیں ہونے دیں گے، خواجہ آصف نے ڈی چوک احتجاج کے حوالے سے بات کرتے ہوئے کہا کہ  اگر پی ٹی آئی کارکنوں کو  26 نومبر کے فیصلوں کا علم ہوا تو وہ شدید ردعمل دیں گے، کیونکہ جب کھڑے رہنے کا موقع آیا تو سب بھاگ گئے۔ 

 آصف نے مزید کہا کہ یہ لوگ بار بار اسلام آباد پر چڑھائی کرتے ہیں مگر ہر بار اپنے کارکنوں کو مایوس کر کے بھاگ جاتے ہیں، ان کا مزید کہنا تھا کہ خدا کے لیے اس ملک میں نفرت کے بیج نہ بوئیں، ورنہ اس کا نقصان ملک کو اٹھانا پڑے گا اور  کہا  کہ  اللہ تعالی پاکستان کو فسادی ٹولے کے شر سے بچائے ۔

خواجہ آصف  کا کہنا تھا کہ پاراچنار میں قتل عام کے وقت یہ خیال نہیں آتا کہ وہ بھی پشتون ہیں، وزیراعلیٰ کی ذمہ داری بنتی ہے کہ صوبے میں امن قائم کریں، ان کو چھوڑ کر وہ وفاقی دارالحکومت پر چڑھائی کے لیے آئے، عمران خان نے سنگجانی کے مقام پر جلسے کی حامی بھری،مگر بشریٰ بی بی نے انکار کیا۔