اسرائیلی فسطائیت کم نہ ہوئی، غزہ فضائی حملے میں مزید 20 فلسطینی شہید

غزہ کے مسلمانوں پر قیامت خیز اسرائیلی فسطائیت کم نہ ہوئی، اسرائیلی فورسز کی گولہ باری، ڈرون حملے اور فائرنگ جاری رہی۔

اسرائیل کے نصیرات کیمپ پر فضائی حملے میں 7 فلسطینی شہید جبکہ متعدد زخمی ہوگئے، ساحلی علاقے میں اسرائیلی حملوں میں 13 فلسطینی نوجوان شہید ہوئے، شمال میں رہائشی عمارتوں پر اسرائیلی حملے میں متعدد شہادتوں کا خدشہ ہے۔

شہدا کی مجموعی تعداد 44 ہزار 758 ہوگئی، 1 لاکھ 5 ہزار 834 زخمی ہو چکے ہیں، مقامی ذرائع کے مطابق بمباری سے ملبے کا ڈھیر بنے علاقوں میں اب بھی بہت سے فلسطینی دبے پڑے ہیں۔

اس کے علاوہ اسرائیلی فورسز کا جبالیہ اور بیت لاہیہ سمیت شمالی غزہ کے علاقوں کا سخت محاصرہ جاری ہے، جس سے ان علاقوں میں مصنوعی قحط کا سامنا کرنا پڑ رہا ہے، دیر البلاح میں اسرائیلی بحریہ نے چھ فلسطینی ماہی گیروں کو حراست میں لے لیا۔