ولادیمیر پیوٹن نومنتخب امریکی صدر ڈونلڈ ٹرمپ کیساتھ سمجھوتے کو تیار

روس کے صدر ولادیمیر پیوٹن نے کہا ہے کہ وہ نومنتخب امریکی صدر ڈونلڈ ٹرمپ کیساتھ کسی بھی وقت ملاقات اور یوکرین جنگ پر سمجھوتے کیلئے تیار ہیں۔

غیر ملکی میڈیا رپورٹ کے مطابق ممکنہ امن معاہدے کے بارے میں ٹرمپ کے اقدامات کے بارے میں پوچھے جانے پرروسی صدر پیوٹن نے کہا کہ وہ آنے والے ریپبلکن کے ساتھ ملاقات کا خیرمقدم کریں گے۔

روسی صدر کا کہنا تھا کہ مجھے نہیں معلوم کہ ڈونلڈ ٹرمپ کے ملاقات کب ہو گی، اس بارے میں کچھ نہیں کہا جا سکتا، میں نے اس سے چار سال سے زائد عرصے سے بات نہیں کی ہے لیکن میں کسی بھی وقت اس کے لیے تیار ہوں۔

پیوٹن نے کہا کہ ”اگر ہماری کبھی منتخب صدر ٹرمپ سے ملاقات ہوتی ہے تو مجھے یقین ہے کہ ہمارے پاس بات کرنے کے لیے بہت کچھ ہو گا، مزید یوکرین جنگ پر روس ”مذاکرات اور سمجھوتے“ کے لیے تیار ہے۔

پیوٹن نے روس کی کمزور پوزیشن کی تردید کرتے ہوئے اس کی بڑھتی ہوئی طاقت پر زور دیا۔ روسی صدر ولادیمیر پیوٹن کا کہنا ہے کہ ان کا ملک 2022 میں یوکرین میں فوج بھیجنے کے بعد سے مضبوط ہو گیا ہے۔

روسی صدر ولادیمیر پیوٹن نے مزید کہا کہ ان کا ملک یوکرین کے تنازع کے خاتمے کے لیے مذاکرات اور سمجھوتوں کے لیے تیار ہے۔ان کا یہ بھی دعویٰ ہے کہ روسی افواج آگے بڑھ رہی ہے اور یوکرین میں اپنے اہم مقاصد کے حصول کے قریب پہنچ رہی ہیں۔